FCS & CA chuan buhfai bothlau leh a rulh letna chungchang mipui vantlangin chiang zawka an hriat theih nan hetiang hian thuchhuah a siam :
Mizoram chhunga Supply Godown-ah te hian chhan hrang hrangte avangin buhfai bothlau a awm thin a. Hetiang thil a lo thlen hian Department chuan hriat chhuah a nih veleh chak takin hma a la nghal thin. Buhfai riral chungchangah a mawhphurtu Department Official hnenah Explanation call a ni thin a. A chhanna azirin Departmental Proceeding/Inquiry draw (lak) thin a ni. Tin, Inquiry Officer atan sawrkar a MCS/MSS officer rintlak ruat thin an ni a. An Inquiry Report azirin Hremna (Penalty) pek thin a ni. Hremna atan hian withholding of increment te, barring of promotion (kaisantir theih loh), etc. a lo siam tawh thin bakah buhfai riral hlutna (value) zat pawisa faia rul tura tih thin an ni. Heng an bat rulh turte hi lump sum recovery (a sum faia rulh) bakah an hlawh atanga, thla tin bi-a chhuta an service chhung ngeia rulh tlaktir tura tih an ni thin.
Champhai DCSO hnuaia officials-te chungah pawh heng kumah te hian action lak a ni: Mimbung - 5.8.2013 & 21.1.2015, NE Khawdungsei - 2.4.2012 & 5.8.2013, Vaphai - 4.4.2012 & 28.5.2014, Kawlbem -25.6.2013, Teikhang - 25.6.2013, Ngopa - 23.3.2010, Farkawn - 2.5.2013, Khuangleng - 24.1.2007 (Khuangleng hian a rul zo tawh a ni)
Kum hnih khat kalta atang khan Department-in hemi chungchangah hian hma chak takin a la thar lehzual a. Official thenkhat liabilities neite pawh anmahni duhthlanna angin, an GPF atangin Rs. 66.58 lakhs lai an lo rul tawh hial a ni. An liabilities rul zo pawh engemawzat an awm tawh bawk.
Vanduaithlak taka liabilities rul zo hman lova thi ta te pawh an awm a, heng mite leiba rulh zawh loh pawh hi, a theih chen chenah rulh a nih theihna atan Account & Treasuries Department nen inrawn tawna hma lak mek a ni a. Pension case fel thei lo pawh engemawzat an awm bawk.
Supply Godown-a buhfai riral chungchang hi Department-in a ngaihthah mai mai lo va, a ngai serious hle a. Amaherawh chu, buhfai riral chungchangah hian a mawhphurtu ber hriatchhuah a nih hma loh chuan, fimkhur takin hma a la thin a. Chhui chian a, enfiah vek hnuah Sawrkar sum bo thlau awm lo turin, chak takin hma a la reng a ni.
