Vawiin khan Chief Minister Pu Lal Thanhawla hovin NEDP Core Committee chu Chief Minister Office Conference Room-ah meeting pawimawh takin neiin an thukhawm a, kum kaltaa NEDP hmalakna te an thlirho a, tun sawrkar kum 2017-18 atana Hmalak Ruahmanna Action Plan an sawiho hnuin an pawmpui a ni. Vawiina NEDP Core Committee meeting ah hian Core Committee Member te bakah Action Plan thehlut tawh Department 15 hotulu te pawh an tel bawk a ni.

Chief Minister Pu Lal Thanhawla’n meeting a thuhmaa a sawi naah NEDP chu Sawrkar flagship programme a nih angin NLUP ang thovin NEDP ah pawh hian mipui a bik takin zokhaw lama cheng ten beiseina sang tak an nei a, kuthnathawktu te, huan neitute leh loneitute chawikan nan leh hmasawnna rualkhai zawk leh chak zawk a awm thei nan a tangkai ber leh a tha thei ang bera duan leh hman tum a ni tih a sawi a. Hlawhtlinna chu a beneficiary-te kutah awm mahse an mahni kaihruaia kawng kawhhmuh turin sawrkar hnathawk leh line department-te an pawimawh a, neitu rilru pu a beneficiary te hmalak puina kawnga sawrkar hnathawk te chu a nawr kaltu (driving force) an nih thu a sawi a. Beneficiary-te tanpui turin leh tha zawka hma an lak theih nan, a endik leh enthlakna lamah evaluation, monitoring leh social audit thlenga hmalak a tul tih thu a sawi. Mizoramin remchanna hrang hrang a neih that dante sawiin Chief Minister chuan kan tan tlan a, theihtawp kan chhuah chuan India ramah Model State kan ni thei a ni, a ti.

Sawrkar kum kalta 2016-17 a NEDP hnuaia hmalakna te chu meeting chuan thlir hovin ruahmanna siam te chu a kalpui dan a tha tawk tih an sawi a, NEDP in a huam zau avangin ruahmanna te chak zawka kalpui a nih theih nan a kalpui dan implementation mechanism tha tak duanna kawnga Committee siam chu tha an tih thu meeting ah hian sawilan a ni a. Tun Sawrkar kum kal mek 2017-18 atana NEDP Action Plan Department 15 atanga thehluh te chu meeting ah hian sawiho a nih hnu in pawm a ni.

United Nations Development Programme (UNDP) aiawhten NEDP in zokhaw lama mipuite a huam zau zawk nan leh an mahni tana hlawk zawka kalpui a nih theih nan a Village Level Development Programme an ruahman  chu meeting ah hian an tarlangin a sawizauna an nei a. Meeting chuan UNDP ruahmanna chu tha tiin kalpui turin hma lak nise an ti a. UNDP puihnaa buatsaih Procurement Handbook for Goods, Services & Civil Works chu Core Committee ah hian pharh niin hman tura pawm a ni a. Chief Secretary kaihhruaina hnuaia din Committee on Land Reforms chu July thla chhunga an Report thehlut turin an ti.

Vawiina NEDP Core Committee meeting ah hian Alternate Chairman Agriculture Minister Pu R. Lalzirliana; Member te - Finance Minister Pu Lalsawta; Education Minister Pu H. Rohluna; UD&PA Minister Pu Zodintluanga; LAD Minister Pu P.C. Lalthanliana; Planning Dr. C. Vanlalramsanga leh Principal Secretary to Chief Minister Pu Lalram Thanga te bakah Department hotulu engemaw zat an tel a ni.

Tarlan tawh thin angin NEDP hian ram hmasawnna atan a hnathawh dan tha zawk kawng kawhhmuhna leh hlawk zawka thawh dan tur ruahmanna te, infrastructure leh assets kan neih mek hlawk zawk a hman leh enkawl dan mumal tak ruahmanna tur te, sawrkar sum dinhmun siam thatna leh dik leh fel zawka hman dan tur ruahmanna te, Mizoram chhunga sumdawnna leh thil tharchhuah hlawk taka kalpui a nih theih nana ruahman te, mipui te tana sawrkar rawngbawlna leh hnathawh chak zawk leh daihzai zawka siam tur a ruahmanna te, Mizo mipuiten thiamna tak tak eizawnna tlak an neih theih nana hmalak te, sik leh sa inthlak danglam nasa lutuk atanga chhiatna thleng thei laka invenna leh Sawrkar hnathawh dan leh hnathawk te hlawk leh inrenchem zawka kalpui a nih theihnan a ruahmanna siam te hi a huam vek a. Hetiang taka huam zau leh economy a nghawng (impact) nei lian tur anih avang hian NEDP hi Comprehensive Growth Strategy tih a ni.

Kumin 2017-18 ah hian NEDP atan hian cheng nuai 75000 ruahman a ni.