National Disaster Management Authority hnuaia National School Safety Programme (NSSP) hmalaknain Mizoram chhunga a hmasa ber atan Govt. JL High School chu Demonstrative Structural Retrofitting (Building thuam that tur) atan thlan a ni a. Hemi programme hnuaia hmalakna hmasa ber atan nimin chawhnu khan building thuamthat pawimawh zia chungchang inhrilhhriatna leh inhrilhzauna ‘Sensitization Programme on the Importance of Structural Retrofitting’ chu school naupangte nen hman ho a ni.

He programme hi Dr. Franklin Laltinkhuma, IAS, Deputy Commissioner, Aizawl leh Chairman, Aizawl District Disaster Management Authority ni bawk leh Pu C. Lalpeksanga, Director, Disaster Management & Rehabilitation Department te chuan an hmanpui. Anni bakah hian mithiam bikten sensitization programme hmangin structural retrofitting lam leh chhiatrupna thleng thei laka inven dan zirlaite an zirtir a ni.

NSSP hi India ram state 22 a district 43 ah kalpui mek a ni a, Mizoram bikah hian Aizawl leh Serchhip district ah school 400 thlan chhuah a ni.