Pu TT Zothansanga, Parliamentary Secretary, Champhai North Bialtu chu nimin khan Champhai atanga 90 Km a hla a awm Selam-ah lehlangin a kal. Tunhnai lawka Selama buaina thleng chungchangah khaw mipuite nen inkawmhona hun tha tak an nei. Bialtu MLA Pu TT Zothansanga chuan buaina thlen hun lai a, Sorkar programme pawimawh a awm avangin Aizawl a chhuahsan theih loh thu sawiin, a theih veleh a lo tlan chhoh thu a sawi a, khaw mipuite hriatthiamna a ngen nghal a ni. A ma bial a thil thleng anih avangin thil thlen hun pawh hian sorkar hotute leh Home Minister ngei pawh a biak dante sawiin, thilthleng chungchanga mipui/nunaute venghim tur leh buaina punlun thei tur veng tura Police te pawh tirh a nih tawh thu an lo hrilh thu a sawi a. Hetiang boruakah hian Politics a vir vel theiin dawt thuthang dik lo tak tak te pawh awm thei anih avangin tun atang chuan khaw mipuite pawh fimkhur turin a chah a, khaw mipuite chu a ngaihsak reng thu sawiin, amah pawh an hmalakna te hriattira finchhuah zel turin a chah bawk a ni. Hetih laia Police pakhat bo, Selam mipui ten theihtawp chhuaha an lo zawnpuinaah Pu TT Zothansanga chuan Selam khawtlang hnenah lawmthu a sawi bawk a ni.

Selam hruaitu ten Kum 2010 a Lengteng Sanctuary a puan chungchang an sawi chu theih anga Aizawl lama hma lo lakpui a tum thu a sawi rualin Bialtu MLA chuan he khua in thil pawimawh an rawt leh an ngiat reng reng a mah chu hriattir ve zel tawh turin a hrilh a, nakin zela hma lakpuina turah pawh harsatna a awm lohna turin Bialtu a nihna anga amah chu hrilh ve nghal zel turin a chah nghal bawk. Buaina thleng avanga hliam tuar mi 14 te chu Rs 500 theuhin a kan a, inlama enkawl te pawh sum faiin a kan bawk.

Tuna Champhai District Jail a tang mek te chhuah chungchang an sawipuinaah Pu TT Zothansanga chuan theihtawp a hma lakpui a tum thu sawiin, hemi chungchangah pawh hian hotu hrang hrang biaa hma a lakpui dan report a pe a, nimin zing dar 7 : 00 khan Forest hruaitute nen inkawmna an neih thu kalkhawm te hnenah hian a sawi bawk a ni.

Selam khaw mipui aiawhin Pu Thangzazena leh Pu MK Lala te pawhin thu sawiin an harsatna tawh hunlai a an ngaih ber chu an MLA niin tuna a hmel a rawn lan thei chu an thla a muan thu an sawi. Police bo chungchangah pawh an rilru a hah thu leh khawtlangina an zawnpui dante sawiin, thuthang tam lutuk avanga inven thiam a tul thu te an sawi bawk a ni.

Pu TT Zothansanga hian nizan Dar 8 : 00 khan Champhai Sub-Headquarter YMA hruaitute kawmin Selam chungchang hi a sawipui a. Vawiin zing dar 10 : 00 hian Champhai DC hotu dangte hemi chungchang sawipuiin a kawm bawk a ni.