State Food Processing Mission, Ministry of Food Processing; Electronic Test & Development Centre (ETDC), Ministry of IT & Communication (Guwahati) leh Mizoram sorkara Industries Department tangkawpin vawiin khan Lunglei Circuit House Conference Hall-ah 'Seminar on-ISO 9000 Quality Management System' neih a ni.

Vawiina Quality Seminar kaihruaitu Industries Jt. Director Pi Lalrodingi chuan ISO-9000 hi eng sumdawnna pawh a huam vek a, Industries Department kaihhnawih bikah chuan 'food processing' hi eitur thil bik khawih a nih avangin ISO chhinchhiahna nei chuan a zuartu leh a leitu te tan pawh a ngaihthat thlak a ni, a ti. Seminar-a Special Guest Lunglei Polytechnic Principal Pu B.Lalhmuakluaia chuan sumdawnnaah hmasawn tak tak tur chuan a thawktute pawh nasa zawka inbuatsaih a ngai a, hmun dangte ang bawkin Mizote pawhin quality tha siamchhuah lamah kan inel a tul dawn a ni, a ti bawk.

ISO-9000 Seminar-ah hian ETDC Guwahati atanga mithiam lo kal Pu P.S.Chakravorty, Addl. Director chuan kalkhawm zawng zawngte food processing chungchangah training a neihpui a. He Seminar-in a tum ber chu Lunglei khawchhung leh a chhehvela 'food processing' hrang hrang leh a kaihhnawiha eizawngte tan quality thianghlim leh changkang zawk, India ram mai pawh ni lo, khawvel hmun dang pawha eitur sawngbawlna lama hmasawn dan tur kawng inkawhhmuh a ni.