Inrinni khan Bukpui, Lungmuat, North Chatlang, Thingthelh leh North Hlimen khua-a Eng petu tur 33 KV Sub Station thar chu Bukpui ah Pu Hmingdailova Khiangte Chairman, Mizoram Youth Commission chuan a hawng.

Heng khua te hian kum 1990 khan Kolasib atangin Kawlphetha (Power) an dawng thin a. 1998 ah Sentlang atangin Power pek leh an ni a; mahse Indian Electricity Supply Rules in a sawi anga Eng chak (voltage sang) pek theih anih loh avangin cheng Nuai 353.50 sengin Accelerated Power Development & Reformed Programme (APDRP) hnuaiah Sub Station thar buatsaih a ni ta a. Hawn anih atang hian mipui ten Eng tha takin an dawng nghal a; Power chak zawng (voltage) pawh Dan in a phut anga sang mipui ten an dawng nghal a ni.

Hawnna inkhawm, Bukpui Bazaar-a neih hi Power Deptt E-in-C Er CL Thangliana’n a kaihruai a. Thusawiin Khuallian Pu Hmingdailova Khiangte chuan Sawrkar in Power hnianghnar duhin beidawnna nena kan thlir tawh Tuirial Hydel Power chu tunah hian zawh fel a ni deuh thaw tawh a. Heng bakah hian Megawatt 2000 chuang pe chhuak thei tur Hydel project hmun 9 laiah a siam bawk a. Chung zingah chuan Kolodyne II project 450 MW pe chhuak tur te; Lungrang Project 810 MW pe chhuak tur te; Chhimtuipui Project 640 MW pe chhuak tur te a tel a ni a ti. Mi thenkhat in NLUP pawisa a awm tawh lo tih te; NLUP avangin Zirtirtu ten hlawh an la thei lo tih chu Dawt a ni. Sawrkar hmasa in an Term tawp dawnah School 337 zet Adhoc Grand in Aid ah an hlangkai a; an hlawh belhkhawm pawh tam tak a ni a. School paih then leh turin mi thenkhat an lawm dawn si lo a. Minister pawh a mangang hial thin a; chuvangin Zirtirtu te hlawh lak theih loh hi NLUP vang a ni lo, a ti a. NLUP hi Prime Minister Special Package a ni lo tih chu a dik a. Mahse Prime Minister Office Secretary in Mizoram NLUP chu tha tiin Deptt danga Secretary te kokhawmin sum pek dan tur a ruahman pui a; Mizoram ah a hlawhtlin an ring a; NLUP Model State anih beisei-in cheng Vaibelchhe tam tak min pe a; min la pe zel dawn a ni, a ti bawk.

Sub Station thar buatsaih anih dan report petu Er Lalduhawma EE Kolasib chuan Eng pekna turin mimal ramah Ban phun leh Hrui kal tir a ngai a; VC leh NGO te tawiawmna avangin hna a kal zel thei tiin Indian Electricity Act 2003, Sec 168 in a sawi angin Power lakna hrui (Line) hnuaiah mimal in thlai phun phal a ni lo, a ti bawk.

Sub Station hmang tangkaitu tur khua te aiawha thusawitu Bukpui VCP Pu Lalbiakhlua chuan mipui te kan lawm a; kan mamawh anga sang Power Voltage kan nei thei tur hi a hlu a ni a ti. Khawtlang in Sub Station thar lawm nan Ruai an theh a ni.