Vawiin khan Bunghmun YMA Hall ah The Mizoram Right To Public Service Act, 2015 chungchangah zirhona Training neih a ni.

He hunah hian sawrkar hnathawkte, khawtlang hruaitu VC-te leh tlawmngai pawl hrang hrang aiawh thahnem tak an tel. Training-a telte hi Dr Peter Malsawmtluanga SDC,Lunglei in he dan chungchanga hriat tur pawimawhte a zirtir a ni.

He Dan in a tum ber chu Mizoram state chhunga mipui ten sawrkar hnathawhna (Public services) tarlan bikah te hunbi tuk chhungin an mamawh an dil chhuah ngei theihna tur atan te leh chutiang hawizawnga mipuite tana awlsamna leh hamthatna awm te pekchhuah a ni a. Mipuite mamawh rang taka ngaihtuah zung zung thei sawrkar (responsive administration) kan neih theih nan a duan a ni. The Mizoram Right to Public Services Act, 2015 hi December ni 1, 2015 khan hman tan a ni a, He Dan hian Mizoram pum pui a huam a (mahse Sixth Schedule hnuaia Autonomous District Council ten he dan hi an adopt loh chuan a huam chuang lo) 

He Dan ina a huam te chu

a) Sawrkar hnathawk nghet te  

b) Hmun dang atanga sawrkar hnathawk a hawh lailawk te (eg:  Deputation)

c) Tualchhung sawrkar a thuneitute 

d) Sawrkar in sum leh paia a tuamhlawm pawl a hnathawktute a huam vek a ni 

Mizoram Right to Public Services Act, 2015 hnuaiah hian sawrkar department hrang hrang Food, Civil Supplies & Consumer Affairs, Rural Development Department, Taxation Department, Public Health Engineering Department (PHED), Social Welfare leh Finance Department te an awm a. Service thenkhat chu ration card pekchhuah te, MGNREGA hnuaia job card sem chhuah te, driving licence siam te, learner’s licence pekchhuah te, tui supply connection te, adoption certificate siam te an ni.