Vawiin khan Tourism Department buatsaih Winter Festival 2018 Ni hnihna chu Tuirial Airfield ah hman chhun zawm a ni a, he hun hi Pi Irene Zohlimpuii Chongthu, Joint Secretary, Tourism department in a kaihruai a ni.

Pi Irene Zohlimpuii Chongthu chuan Winter Festival chu Mipuite ta leh mipuite tan a buatsaih a nih angin a hlawhtlinna pawh mipuite hnenah a in nghat tlat a ni, a ti a, ram chhung leh pawn atanga heng festival hmanga zin mi tam zawk kan hip theih nan Tourism Department hmalakna mai hi a tawk lova, mipuite nen a kan thawh hona leh kan tan rual tlat hi a pawimawh a ni, a ti bawk.

Chaltlang Lily Veng branch YMA ten a Ni hnihna hun hi zaiin an hawng a, Mizoram Cultural Organisation atangin hnam lam leh 23 Sector Assam rifles ten Khukri dance entirna hun an nei a, Mizoram Winter Festival 2018 puala Slogan Writing inziahsiak buatsaiha a thazual pathum thlan chhuahte hnenah lawmman hlanna hun hman a ni bawk. Winter festival thawhhnihnaah hian rawlthar talent nei tha tak tak ten an thiamthil, cycling, yoyo leh skateboarding te entirin chawhnu lamah zaithiam hrang hrang ten hun an hmang bawk a ni. Winter Festival 2018 hi Decemeber 13, 14 leh 15 chhunga hman tur niin Tuirial Airfield ah hian intihhlimna hrang hrang chhawp chhuah a ni a, Food court, Hot air balloon, Zorbing, Archery, Powered Paratrike te awm in Painting, Orchid Exhibition te a awm bawk a, hnam lam leh zai te entir niin mipui thahnem tak bakah ram pawn atangin zin mi enge maw zat chhimtu an awm bawk a ni.