Nimin khan DM & R Minister Pu C. Ngunlianchunga chuan Lawngtlai District-a Bungtlang 'S' khuaa puitling ziak leh chhiar zir mekte tan NPCB&VI hnuai atangin a thlawnin tarmit a sem.

Bungtlang 'S' khuaa sawrkar hna thawk inzawm khawm (Govt Employees Association) te'n puitling ziak leh chhiar thiam lote tana Zan Sikul an siama kalte hnena tarmit semna hun hi Bungtlang 'S' PHC Complex-ah neih a ni a. Pu C. Ngunlianchunga chuan sawrkarin mi retheite a ngaihsakin, a ngai pawimawh em em a, damlote'n sum tam tak an sen tur, mahni sum sen ngai lovin RSBY hnuaia Health Care Smart Card hmangin kawng min siamsak a, chu chu tangkai taka hman thiam a pawimawh hle a ni, a ti a. Ziak leh chhiar thiam hi a hlu a, Bible chhiar thiam ringawt pawh a tangkaiin, mahni hming ziak thei nih pawh a hlu em em a ni tiin, Bungtlang 'S'-a Govt Employees Association te thahnem ngaihna avanga puitling ziak leh chhiar thiam lote tana Zan Sikul din a ni chu lawmawm  a tih thu leh an inpekna fakawm a tih thu a sawi a. Zan Sikul kal zinga mit tha lote tana a thlawna tarmit sem a nih theih nana hma latu Lawngtlai Health Department-a thawktute chungah lawm thu a sawi bawk.

Tarmit semna inkhawm hi Bungtlang 'S' BDO Pu Daniel Sailo MCS chuan a kaihruai a. He huna thu sawitu dang Lawngtlai District-a Sr Medical Officer Dr S. Thaizy chuan tarmit sem chu National Programme for Control of Blindness & Vision Impairment (NPCB & VI) atanga kalpui a nih thu leh tarmit dawngtute pawh Lawngtlai District Hospital atanga Opthalmist-te'n an mit an endiksak vek a, an mit mil tur power siamsak an nih hnuah sem chauh a nih thu a sawi a. Mi dang pawh an mit endik mek a nih thu leh a mamawhte hnenah sem zel a la nih tur thu a sawi bawk.

Tun tumah hian mi 34 te hnenah Khuallian Pu C. Ngunlianchunga leh amah tawiawmtu a nupui Pi KR Chhingpuii te chuan tarmit hi an sem a ni.