Evangelical Free Church of India (EFCI) te'n Lawngtlai District-a Hmunnuam khuaa Grace Evangelical School an din thar chu AH & Vety Minister Pu C. Ngunlianchunga'n nimin khan a hawng.

Pu C. Ngunlianchunga chuan Hmunnuam khawtlangin zirna lama hma an sawn theih nana EFCI-in english medium sikul an din chu lawmawm a tih thu a sawi a. An sum sen ngaihtuaha sikul in tha tak an sa thei chu entawn tlak an ni tiin, khawtlang, bial leh ram hma sawn nan mi thil tha tih entawn a, hna thawh that chu intihhmuh zel a pawimawh a ni, a ti. Sikul enkawltute leh zirtirtute chu mite chhinchhiah tlak sikul a nih theih nana theih tawp chhuah tura fuihin, naupangte chu ram hmakhaw innghahna an nih avangin lehkha mai ni lo, nun dan dik leh thiam thil dang te pawh zirtir tel turin a chah bawk.

He hun hi EFCI Lunglei Presbytery Ramthar Board Secretary Pro Upa R. Malsawmkima'n a kaihruai a. Bungtlang 'S' bialtu Pastor Lalbiakhlua'n hunserh hmangin, GES zirlaite'n Khuallian lawmna hla an sa a. EFCI Lunglei Presbytery P.S. Rev. Lalthazuala Fanai chuan sikul din a nih dan report a pe a. Khual zahawm, LADC-a Executive Member i/c Education (M/S) Pu Laltlawmlova Chinzah-in fuihna thu a sawi bakah, Hmunnuam EFCI Local Church leh VCP te hnen atangin thu sawi tawi leh EFCI Lunglei Presbytery Chairman Upa R. Lalkhuma hnen atangin lawm thu sawina ngaihthlak a ni bawk.

GES hi kum 2017 May thla khan din tura rel a ni a. Hmunnuam tlanga ram square metre 20,000 an neihah a ruhrel hnuai lam RCC, a bang thingphel leh a chung rangva hmangin fit 71x14 (+6)-a zauvin an sa a. A sak nan hian mistiri tha 45, helper tha 43 leh hnatlang tha 150 leh pawisa fai Rs 3,50,000/- sen a ni. Kindergarten (KG) atanga Class-IV thleng awmin, tunah hian zirlai 102 an nei a, zirtirtu 5 an awm bawk. Sikul hmun hi khua atanga a kal tham deuh avangin, Khuallian, bialtu MLA ni bawk chuan NEDP atangin a panna step siam nan Rs 1,50,000/- a pe nghal a ni.