Nimin khan Lawngtlai District-a Diltlang 'S' khuaa Circle Horticulture office building sak thar chu AH & Vety Minister Pu C. Ngunlianchunga'n a hawng. 

Pu C. Ngunlianchunga chuan sawrkarin kut hna thawktute a ngaihsak a, anmahni pui tur department-te pawh a duatin a thuam chak nasa hle a ni, a ti a. Diltlang chu Circle Horticulture Officer thut hmun ni sa reng mah se, office building tha an neih loh avangin hna thawh a harsa a, tuna office building thar hawn theih a ni ta chu lawmawm a tih thu sawiin, bial mipuite'n horticulture kaihhnawih thei leh thlai thar chhuah lamah hma an sawn phah ngei a beisei thu a sawi. Sawrkar chu mi retheite lama tang, anmahni pui tura inpeih reng a nih thu sawiin, Pu C. Ngunlianchunga chuan sawrkar hma lakna hrang hrangte chu mipuite tan a ni a, a bik takin kut hna thawktute phei chu sawrkarin a ngaih pawimawh berte an ni, a ti a. NLUP leh NEDP hmanga ram hmasawnna tura a hna thawh tawh sa chu chhunzawm zel a ni dawn a ni, a ti.

Khual zahawm, LADC-a Executive Member Pu Laltlawmlova Chinzah pawhin rilru sukthlek dik neih a pawimawhzia a sawi a. Kut hna thawktute chu sawrkar puihna nghaka thu viang viang mai lovin, sawrkar ko eih thei leh puih tlaka rim taka hna thawh a tul a ni, a ti. 

Office building thar hawnna hun hi Lawngtlai Divisional Horticulture Officer Pu L. Lalhmingmawia Pachuau chuan a kaihruai a. LIKBK Diltlang bialtu pastor Rev. Malsawmdingliana'n hunserh hmangin, Diltlang CHO Pu N. Vanlalhluna'n thu a sawi bakah, Diltlang VC member Pu S. Lianthangmawia'n lawm thu sawina hun a hmang bawk.

Diltlang-a Circle Horticulture Officer's office hi fit 30x30-a zau, Office leh Godown bakah, CHO Qtrs awm nghal a ni a. RCC, a chung Dynaroof a ni. Building sakna senso hi Rs nuai 10 a ni a. A complex hi square metre 288-a zau niin, a kawt zawl hi PCC-a zut vek a ni a, a hungna tha tak siam a ni bawk.

Diltlang Horticulture Circle hian khaw 54 enkawlin, CHO/HEO Gazetted officer-in a awp a ni a. He'ng khuate hi Horticulture thlai leh thei tam tak tharna niin, heti ang thar theihna tha tak tak a awm a ni. Thawktu hi CHO bakah hian Horticulture Demonstrator 1 a awm bawk a. Horticulture Department atangin thlai enkawlna hmanrua leh rannung leh natna laka venna hrang hrang subsidy leh a thlawna sem tur an kawl reng a ni.