Vawiin chawhma khan Health & Family Welfare Department hnuaia National Health Mission hmalakna in Chawlhhmun Urban Primary Health Centre Aizawl ah Health & Wellness Centre hawn a ni a, Health & Family Welfare Minister Pu Lal Thanzara chu Khuallian niin he hun hi a hmanpui.
Health Minister Pu Lal Thanzara chuan Mipuiten kan damloh lai mai ni lovin, hriselna vawng rengtu ni turin kan Health system te hi kan beisei tawh a, hemi kawnga hmalakna pawimawh tak pakhat chu Health & Wellness Centre din hi a ni, a ti a. Pu Lal Thanzara chuan Kum 2018-19 chhung hian Health & Family Welfare department chuan Aizawl, Mamit leh Lunglei district a Urban Primary Health Centre (UPHC), Primary Health Centre (PHC) leh Sub-Centre (SC) thenkhatte chu Health & Wellness Centre ah hlankai anih theihna turin hma an lak mek thu a tarlang a. Health minister chuan Aizawl ah UPHC 6, Lunglei ah UPHC 2, Mamit ah PHC 3 leh SC 16, Haulawng PHC leh a hnuaia sub-cebtre 4 te hi Health & Wellness Centre a hlankai tur an ni, a ti a, Central sawrkar duh dan angin Health & Wellness centre 4, Kawrtethawveng PHC, Rawpuichhip PHC, ITI UPHC leh Chhawlhhmun UPHC te hi naktuk Ni 15 ral hma ngei hian hlankai hman tum a ni, a ti bawk. Health minister chuan Health & Wellness Centre pawimawhnate tarlangin, Natna neite tih dam leh hrisel lehzualna inzirtirna a ni dawn a, rilru lam hriselnate ngaih pawimawh niin Counselling lam thlengin kalpui a ni dawn a ni, a ti.
Chawlhhmun Urban Primary Heath Centre a Health & Wellness Centre hawnna hi Dr Lalrozama, IAS, Mission Director National Health Mission in a kaihruaia, Dr Lalnuntluangi, State Nodal Officer, Health & Wellness hnen atangin Health & Wellness kalpui dan turte ngaihthlak a ni a, Dr Vanlalchhuangi, Medical Officer UPHC Chawlhhmun in UPHC a hna an thawh dan tlangpui tarlanna hun a hmang bawk. He hunah hian Health & Family Welfare department a hotute leh Chawlhhmun Veng Local council, MHIP, khawtlang hruaitute leh mipuiten an telpui a, Dr David Zothansanga, State Nodal Officer, National Urban Health Mission in lawmthu sawiin hun tawp a hmang a ni.
Health & Wellness Centre te hi Ayushman Bharat hnuaia huam zau zawk a hriselna kawnga an mamawh ang mipuite pekna tura sawrkar ruahman ani a. Tun hma zawnga Reproductive & Child Health (RCH) leh Communicable diseases, heng TB, HIV te chauh huam lova, tunlaia natna rawn pung chho, lung natna, BP sang, zunthlum, te zau zawka huam tura ruahman a ni. Health & Wellness Centre in a tum ber chu, mipuite hnena Primary Health Care changtlung, Comprehensive Primary Health Care pek a ni a, Natna inkaichhawn theih (Communicable disease), Natna inkaichhawn theihloh (Non-Communicable disease) leh Reproductive, Maternal & Child health te mipui hnena pek hi a ni. Health & Wellness centre huam chhunga awm mipuite chu hriselna kawnga an dinhmunte chhinchhiah an ni anga, Kum 30-65 inkar zawng zawngte chu Zunthlum leh thisen sang an neih leh neihloh test vek tur a ni bawk ang. Heng centre huam chhunga natna neite chu Doctor ten an enkawl anga, a tul dan a zirin damdawite pawh a thlawna pek an ni dawn a ni.
Mizoramah 2018-19 chhung hian Urban PHC 8, Rural PHC 4 leh sub-centre 20 Health & Wellness Centre a hlankai tur a ni a, a senso hi National Health Mission (NHM), Ministry of Health & Family Welfare atanga rawn kal tur a ni. Health & Wellness Centre te hi hriat hrannan rawng hran neia, damdawi leh test hrang hrang mipuite mamawh a thuam that leh wellness – rilru, taksa leh thlarau lam hriselna te huam thei tura tihchangtlun tur an ni. Health & Family Welfare Department chuan Health & Wellness Centre a PHC leh sub-centre hlankainan hian JHPIEGO, international NGO te a thawhpui meka, Technical leh financial support te pe in, consultant pakhat NHM ah an post bawk a Delhi lam atangin mithiamten an vil pui reng bawk a ni. Chawlhhmun PHC hi health and wellness centre atana hawn hmasak ber a ni.
