Vawiin khan Chief Minister Pu Lal Thanhawla chuan a chenna CM Bungalow-ah Union Minister of State for Agriculture & Farmers' Welfare Pi Krishna Raj leh a pasal Virendra Kumar Raj te chu kawmin, Mizoram kuthnathawktute hamthatna tura hmalaknate an sawi dun.

Union Minister Pi Krishna Raj chuan Mizoram chu ram nuam tak leh kuthnathawktute tan pawh a ram tha tak nia a hriat thu sawiin, agriculture leh allied department te hmalakna hrang hrang a hriatpui thu a sawi a. MULCO hmalakna chu lawmawm a tih thu sawiin, bawng vulh a bawnghnute zuartute an hlawk leh zual theih nan "dairy entrepreneur development scheme" neih theih dan ngaihtuah tha a tih thu te a sawi bawk. Union hian Chief Minister chu AH & Veterinary Department hnuaiah ambulance - Mobile Animal Dispensary pek a remtih sak thu a hrilh bawk a ni.

Chief Minister Pu Lal Thanhawla chuan Union Minister hnenah hian kuthnathawktute mamawh hrang hrang thlen in, Agriculture Market Road siam chu hmarchhak state te tan a special package a dah te, Oil Palm Fresh Fruit Branch leina Minimum Support Price chungchang te, thawnchhuahna chawi tihtlem te, Crude Palm Oil Refinery din te, RKVY atana central leh state sum intumsem Dan tihtlem te, India hmarchhak state te tan a marketing strategy hranpa siam te leh Mizoramah zau zawka Organic Farming kalpui theih dan tur te a sawipui a. Union Minister chuan RKVY hnuaia Mizoramin project 111 a dil chu pawm sak in, sawrkar laipui leh state intumsem dan tur pawh state dang a 75:25 ni thin chu Mizoram tan 90:10 a tihhniam sak a rem ti bawk. Agriculture Department in Mizorama link road awm te all-weather road a thlak tura a dilna chu Union Minister hian bawhzui dan tur lo ngaihtuah pui a tum thu Chief Minister hi a hrilh bawk a ni. Oil palm sawngbawlna tur Refinery pawh India hmarchhak state te tan din a nih thuai theih nan hmalak pui a tum thu a sawi bawk.