Ni 9.8.2018 khan State Level Executive Committee on Bamboo chuan an Chairman Chief Secretary Pu Arvind Ray, IAS hovin Mizoram World Bamboo Day 2018 hman dan tur chungchang an rel a, Ni 18 &19.9.2018 hian ropui taka Mizoram World Bamboo Day hman an rel thlu ta a ni.
 
World Bamboo Day hi Kum 2009 atang khan World Bamboo Organization in kumtin in September Ni 28 hian an lo hmang thin a, khawvel hmun hrang hrangah Mau tangkaina leh pawimawhna te inzirtirna hun hmangin Programme pawimawh tak tak te an lo siam thin a ni. Hemi denchhen hian hmarchhak State bik atan he World Bamboo Day hi a huhova hman thin nise tiin rel a ni a, 2017 khan Nagaland ah hman niin kumin hian Mizoram in kan thleng ve dawn a ni. He Programme duan chhin dan chuan Ni 18.9.2018 Dar 11:00 Am R. Dengthuama Indoor Stadium ah tan ani anga, Inauguration Programme ah hian mi pawimawh sawm bikte thusawina hun leh zai te ngaihthlak anih bakah School naupang hrang hrang atanga Bu 20 zet hmangin Cheraw Kan neih tur ani bawk.

Hawnna Programme zawhah hian Exhibition cum Sale hawnna neih nghal ani anga, hetah hian Hmarchhak State tin atangin Dawr rawn hawng tur an awm bakah Zoram leh pawn lam atangin Mau hmanga thiam thilte entirna dawr hawn ani bawk ang.

Hetih rual vek hian School naupang tan On the Spot Painting Competition te, On the spot Weaving Competition (Hnangtah) te neih ani anga, tin, YMA Branch tana Inelna Lehkhachaih Inchaihsiakna a awm bawk ang. Mau chungchanga thlalak Competition buatsaih ani bawk dawn a ni. Chawhnu lamah Technical Session te neih ani anga, hetah hian Mithiam ten Mau chungchang te, Mau Industry chungchang te sawina an nei dawn bawk a ni. Tin, Mau hi insak nan a hmantlak zia Research Report ngaihthlakna leh sawi hona neih ani bawk ang.

A Ni hnihna Dt.19.9.2018 ah hian Exhibition cum Sale hi chhunzawm zel anih bakah Buyer-Seller Meet buatsaih ani anga, hemi hunah hian State pawn atanga lokal te leh Zoram a mite tan an siam chhuah nasa zawka hralh chhuak turin an indawr tawn dawn a ni. Tin, hemi Ni hian Bamboo Centre, Bethlehem Vengthlang ah Student te, Lonei mite tan leh aduh apiang tan Mau Huan enna leh zir hona neih ani anga, he Huan ah hian Mau chi hrang hrang 20 chuang hmuh tur a awm dawn a ni, tlai lamah Cultural Evening buatsaih ani anga, hetah hian Mau atang thil siam Model ten Fashion Show hmangin an lantir anga, tin, Mizo zai mi thiam tak tak ten mipui an awi dawn bawk a ni.

Meeting hian National Bamboo Mission hnuaia kumin chhunga pawisa hmandan tur te an sawi hova, Mau ching tute, Mau Industry neitute leh sumdawngte tana nasa taka hmalak chhoh an tum bawk a ni.

He Bamboo Day hmang tur hian Mizoram, India ram leh ram pawn ami te engemaw zat rawn tel tura beisei an ni a, he Bamboo Day thupui chu “Mau – Kan Hausakna/ Sumhnar” tih a ni.