Vawiin chawhnu dar 1:00 khan Soil & Water Conservation Department Serchhip District chuan  BNRGSK Hall, Bungtlangah an Department hnuaia Hmunphiah trade thlangtu te hnenah NLUP 3rd & 4th Phase tanpuina pawisa an sem chhuak.

He hun hmanpuitu Pi Vanlalawmpuii Chawngthu, MLA, Chairperson, Mizoram Women Commission chuan sawrkar flagship programme hlawhtlinna chu a dawngtu mipuite kutah a innghat a ni a ti. A thlawna sum sem kan inzirtir tia sawiselna awm thin mahse mirethei lei rem rap thei lo, rahbi tleu mekte chawikan nan hian a thlawna sem a tul a ni a ti bawk. Sawrkar tha kan duh chuan mipui tha kan awm ve a tul a, vawiina tanpuina sum kan sem pawh hi a nihna tur taka hmanga hlawhtlinna chang tura kan thawh chuan, a petu sawrkar laka lawmthu sawina ropui tak a ni a ti a. Hnathawk thate chhawmdawl nan sawrkarin NEDP a sem chhunzawm dawn a, Party mi leh sa induhsakna awm lovin hnathawk thate hnenah chauh pek zel a ni ang a ti bawk.

Hmeichhiate hamthatna leh chawikan nan sawrkarin nasa takin hma a la mek zel a, hmeichhiate chunga hleilenna hi kan do tlat zel tur a ni a ti a, hmeichhia harsatna tawk mahni a hma lak dan tur hre lo pui turin Mizoram Women Commission chu a in hawn reng thu a sawi bawk. Vawiina NLUP kalpui mekah pawh hian a zarzotu tam ber chu hmeithai dinhmun tleu tawh te an ni a. Hmeichhiate hian NLUP trade hrang hrang kaltlangin hlawhtlinna an chan mek zel thu a sawi bawk. Khuallian hian tanpuina dawngtu mi 10 hnenah tanpuina pawisa Rs. 51400.00 theuh a hlan a, tanpuina dawngtu mi dang zawng chu an bank account ah thun sak an ni.

Vawiina NLUP tanpuina sem chhuah te hi 3rd Phase atangin chhungkaw 33 hnenah 3rd Instalment pawisa Rs 31780.00 leh instalment hnuhnung ber Rs. 19620.00 nen Rs. 51400.00 theuh pek an ni a. 4th Phase atangin chhungkaw 15 hnenah 3rd  Instalment Rs. 31780.00 leh instalment hnuhnung ber  Rs. 19620.00 nen Rs. 51400.00 theuh pek an ni bawk a ni.

Vawiina NLUP pawisa semna hi Pi Rosy Lalmuansangi Hmar, District Soil & Water Conservation Officer chuan kaihruaiin, a dawngtute chu an dawn chhan ang takin an tanpuinate tha taka hmang turin a chah a, vawiina Bungtlang khuaa NLUP pawisa sem anih rual hian District chhung khaw danga mite bank accountah thun sak vek an nih thu a sawi bawk a ni.

Attachment

  • Loading attachment...