Vawiin (13.08.2016) chawhnu dar 2 khan Lawngtlaia Independence Day 2016 lawm tur pualin damdawi in, tan in leh chhawmdawlna in thlan bikte hnenah Lawngtlai District Independence Day Celebration Committee hmingin tanpuina thilpek hlan a ni.
He'ng thilpek an hlante hi Lawngtlaia damdawi in pathum - Lairam Christian Medical Centre, Christian Hospital leh District Hospital te bakah, Lairam Motherless Home leh District Jail te an ni a. Tanpuina hi Rs 2000 theuh pek niin, Lawngtlai District Independence Day Celebration Committee ai awhte chuan a hmunah kalin an hlan a ni.
Lawngtlaiah hian kumin Independence Day hi Central YLA Playground-ah zing dar 10:30-ah UD&PA Minister Pu Zodintluanga hovin hman a ni dawn a. Parade Contingent 19 awm tura ruahman niin, nimin zirtawpni khan parade contingent-te hian final rehearsal an nei tawh a. Lawngtlai District huam chhunga MLA pathum te leh Lai Autonomous District Council-a MDC-te pawh Independence Day an hmanna tur lamah an chhuak tawh bawk.
