3831/2023-2024

Dated the 14th February, 2024: Vawiin khan Chief Minister Pu Lalduhoma chuan a office-ah Burma Advocacy Group (BAG) hruaitute a kawm a. Burma Advocacy Group hruaitute hian Burma atanga raltlan te tha tak leh duat taka Mizo mipuiten an lo tuamhlawm avangin Chief Minister hi lawmthu an hrilh.

Chief Minister hian, nimin piah maiah khan Delhi ah Union Home Minister Pu Amit Shah nen kan inkawm a, heng raltlante kan chhawmdawlna kawngah a tul anga min puih a inhuam thu min hrilh a. Kan unau, rambuai vanga himna zawnga rawn raltlan te hi kan theih ang angin kan tanpui zel dawn a. Kan tlawmngaipawlte, kohhran leh mimal te pawhin nasa takin an tanpui a ni, tiin raltlante chungchanga a hmalakna tharlam te a lo hrilh a ni.

Burma Advocacy Group te hi American Baptist Churches of USA leh US a awm Chin Baptist Church te, Karen Baptist Church te, Baptist Union of Norway te leh an thawhpui pawl hrang hrang te an ni a. An hruaitu Rev. Dr. Roy Medley, General Secretary Emeritus, American Baptist Churches chuan, Baptist Church te leh Burma mipuite hian kum za hnih dawn inzawmna kan lo nei tawh a. Tuna an harsatna leh manganna te hi kan vei em em a, kan theih ang tawka tanpui kan duh a, Mizoram mipuiten in lo tuamhlawmnaah pawh kan lawm hle a ni. Anmahni tanpui zel tura in thawhpuina pawh kan ngen a ni, tiin Chief Minister hnenah hian a hrilh a ni.

Burma Advocacy Group hruaitute hi Baptist Church of Mizoram leh Lairam Isua Krista Baptist Kohhran ten an lo mikhual a, Mizoram an cham chhungin Mizoram mi pawimawh thenkhatte hmuin an kal kual ang. Upa Joseph Lalhimpuia chuan a tul angin a lo kaihruai dawn a ni.