3830/2023-2024

LUNGLEI; the 14th February,2024: Vawiin chawhnu dar 1:00 khan Jail Visiting Board member ten Lunglei District Jail, Sazaikawn an tlawh. Vawiin Jail tlawhna programme tawi hi Jail chhunga Hall-a hman a ni a, programme hi Pu Vanlalenmawia, Chairman Jail Visiting Board cum Chairman District Legal Service Authority, Lunglei chuan kaihruaiin, Pu T.Lalhlimpuia, Lunglei West Bialtu MLA chuan khuallian niin, Pu C.Lalthanmawia, DIG(SR) leh Pi Ramdinliani, District Bawrhsap te chuan khualzahawm niin an hmanpui hlawm a ni.

Vawiin programme hmanna-ah hian thu sawiin; khuallian Pu Hlimpuia chuan rawngbawlna avanga Lunglei District Jail chu vawi hnih a tlawh tawh thu a sawi a. District Jail hi a building rawp tawhtak leh staff indaihlona-ah te veiawm a ti thu sawiin, tunah hian Jail sak thatna tur DPR pawh buatsaih mek a ni a. Sawrkar tharah chuan heng District Jail in harsatna an nei te hi sutkian a nih theih ngei a beisei thu a tarlang. Khuallian chuan amah pawhin Bialtu MLA a nihna zawn atangin thei tawp a chhuah tur thu sawiin, hemi kawngah hian tupawhin inthlahrung lova an biak pawh reng thei tur thu a sawi bawk. Jail tang te fuihna thu sawiin, Jail tang tam tak hi sual vang aimahin vanduai vanga tang te in ni hlawm a, sawrkar chuan Jail tang te tan thiamthil zirna tur( Skill Development Project) ruahmanna a siam mek a. Jail in tan chhung hun hi hmang tha u la, Jail atanga in chhuah hunah pawh leirem rapa, nun kawng tha zawha, chhungkaw din a, India khua leh tui tha in ni leh thei a ni; tih hre reng ang che u , a ti.

Khualzahawm Pu C.Lalthanmawi a chuan Jail tawt aiin Jail ruak hi Kristian tamna state tan chuan a mawi a,Jail hi inhremna aiin insiamthat nana siam a ni, a ti.

Pi Ramdinliani, khualzahawm pawhin Jail hi inhremna ni lova, nun siamthat nana siam a ni thu uar taka sawiin, Jail tang te chu beidawng mai lova, tha taka an jail tan hun chhung hmang tling-tla a, nun thar nei chunga Jail chhuahsan tum turin a chah hlawm a ni.

District Jail Lunglei hi 19th Sept 1977 atanga luah tan niin, Head of Office hi Superintendent a ni a. Mizoramah chuan Jail lianber pahnihna a ni. Jail din tirh lam hian CRPF ten Jail hi vengin, anni hnuah MAP te hman leh an ni a. Tunah chuan Security Armed Guard hi MRHG & CD te kutah a awm mek a ni. Jail chhung guard staff te erawh Jail warder te an ni.

Tun dinhmuna District Jail Lunglei capacity chu Mipa-99 leh hmeichhia-10 , avaiin 109 a ni laiin, tunah hian Mipa-129 leh hmeichhia-25 an vaiin 154 an tang mek a ni.

Tunah hian staff indaihlohna hi a nasa hle a, warder pakhat in tang paruk veng tura Manual in a tih laiin; za chuang an ven ngaih chang te a awm thin. Staff dah belh mai bakah sanction post (warder bik-ah) siam belh pawh thil tul tak a ni. Vawiin proramme-ah hian “Jail inmates & Visiting Officials-Interaction session” neih nghal a ni a. Jail tang ten an harsatna leh ngaihmawh hrang hrang te an sawichhuak ve a, Jail thuneitu te pawhin Jail Visiting Board hnenah hian an harsatna hrang hrang te lo thlenin, a rang lama hma lak sak turin an ngen a ni.

Vawiin programme hman zawh hian  jail tang te tan Mental Health Camp buatsaih sak nghal a ni.