No.341/2021-2022

Dated Serchhip, the 30th April, 2021: Vawiin hian Serchhip District Magistrate Pu Kumar Abhishek, IAS, Bye-Election Returning Officer ni bawk leh Pu Stephen Lalrinawma, SP, Serchhip te chuan DC Meeting Hall-ah 26- Serchhip Bye Election vote chhiar nia inbuatsaihna sawifiahin joint Press Briefing an nei a, May ni 2, 2021 Pathianni lo awm tura vote chhiar tura inbuatsaihna te engkim peih fel a nih tawh thu an sawi.

He Press Briefing-ah hian Pu Kumar Abhishek, IAS chuan, vote chhiar tura inbuatsaihna te chu zawh fel vek tawh niin vote chhiar tura an inpeih tawh thu a sawi a. DC Conference Hall chu counting hall atana buatsaih a nih thu sawiin Covid19 himna dante zawm chunga vote chhiar nan a zauh tawk thu a sawi a ni. Vote chhiar hna hi micor- observer sawm, counting supervisor pariat, counting assistant sawm bakah data entry operator leh supporting staff ten Returning Officer leh Asst. Returning Officer te kaihhruaina hnuaiah an thawk dawn a, Election Commission of India dan angin candidate leh an counting agents ten counting hall chhungah hian an thutchilh ve bawk ang. Vote chhiarna dawhkan hi pasarih a awm dawn a, vote hi kual nga (round 5) chhiar tur niin, EVM te chhiar a nih zawhah VVPAT panga chu ECI dan anga EVM a vote tlate nena khaikhin chunga chhiar leh tur a ni ang. Round tin result te hi RO's Media room leh Bye Election Media Centre kaltlangin media mite hnenah rang taka pek chhuah thin a ni ang.

Vote chhiar niah hian Covid19 hripui leng mek laka himna tur dan Election Commission of India leh Mizoram sawrkar thupek hrang hrangte tha taka kenkawh tur a ni a, hei vang hian counting hall mai nilovin Counting Centre/campus (DC Office huam chhung) a vote chhiar nia lut thei tur chin hi uluk taka thliar fel niin, phalna nei chauh helaiah hian luh theih a ni dawn a ni. Counting hall leh a chhehvel venhimna hi security thuah thuma kalpui tur a ni a, phalna neite chauh luh theih a nih dawn avangin phalna lehkha nei lote chu result ngaichanga Counting Centre (DC Office Complex) pan lova Media kaltlanga lo ngaichang zawk tura ngen an ni.

Election Commission of India chuan vote chhiar nia vote chhiartute leh candidate leh an aiawh party mite Covid19 laka an himna tur dan fel fai tak a duang a, vote chhiar nia ‘chak lawmna pun khawm' huaihawt pawh khap niin, Certificate of election dawng tur pawhin mi pahnih aia tamin candidate thlan tlin thar chu an zui phal a ni dawn lo a ni. 

Vawiin Press Briefing-ah hian Pu Stephen Lalrinawma, SP, Serchhip pawhin vote chhiar nia venhimna hnathawh dan tur tlangpui sawina a nei a ni.

Media miten zawhna an neihte leh sawi tur tul dangte sawihona te neih zui a ni bawk.

District Magistrate leh Superintendent of Police te Press Briefing hi Pu Amol Srivastava, IAS, Asst. RO, Pu Lalmuansanga Ralte, Addl. DC, Pu K. Saitluanga, Media Nodal Officer leh mi pawimawh dangten an tawiawm a ni.