No.342/2021-2022

Aizawl, 30^th  April, 2021 : Vawiin khan Taxation Auditorium, MINECO-ah Mizorama COVID-19 inkhuahkhirhna kalpui mek thlirho a ni a, he hun hi Health & Family Welfare Minister Dr. R. Lalthangliana'n kaihruaiin, DM&R minister Pu Lalchamliana, MOT Chairman Dr. ZR Thiamsanga, MLA, Chief Secretary Pu Lalnunmawia Chuaungo bakah COVID-19 dona kawnga hmalatu department hrang hrang hotute bakah Mizoram Kohhran Hruaitute Committee (MKHC), Aizawl City Area Local Council Association leh Medical Operational Team aiawhte an tel a ni.

Vawiina meeting chuan May ni 3, 2021 zing dar 4:00 thlenga kalpui tur Mizoram puma inkhuahkhirhna dan kalpui mek dinhmun uluk takin an sawiho a. COVID-19 laka Zoram mipuite kan him lehzual theih nan inkhuahkhirh hi kalpui chhunzawm tha an tih bakah, inkhuahkhirhna dan pawh tun aia khauh zawka siam that ni se an ti a. State Executive Committee on State Disaster Management-in ruahmanna thar hi an siam dawn a ni.

Vaccine chungchang report ngaihthlak niin tun thlengin vaccine dose 2,99,870 Mizoramin a dawng tawh a, vawiin hian dose 1,00,000 a rawn thlen belh leh a ni. Vaccine dose 2,46,478 pekchhuah tawh niin, mi  45,435 in vaccine second dose an la tawh a ni. Sawrkar laipui record danin Mizorama kum 45 chin chunglam zinga 54.29% hnenah COVID-19 vaccine hi pek tawh a ni tawh a, India ram puma kum 45 chunglam hnenah pekchhuah zat chu 29.73% a ni thung.  

Sawrkar laipuiin May ni 1, 2021 atanga kum 18-44 inkar vaccine pek tur a tih chungchanga hmalakna tarlan niin,  H&FW department Special Secretary-in COVISHIELD siam chhuaktu Serum Institute Pvt. Ltd., hnenah kum 18-44 inkar tan vaccine dose nuaih 10.22 Mizoramin a mamawh thu a thlen tawh a, hei hi Serum Institute Pvt. Ltd., chuan rawn chhang let tawhin kar 4 chhungin an rawn tihchian theih an inbeisei thu an sawi a, Mizoramin dose a mamawh zat chu thla 3-4 chhunga mamawh dan azira a tahtawl deuh hleka pek chhuah tura ruahmanna siam turin an rawn hriattir a ni.

Hetih lai hian sawrkar laipuia  Ministry of Health & Family Welfare hotute chuan vaccine siamtute nen an inbiak rem hnuah Mizorama a bul tan nan (kum 18-44 tan) COVISHIELD vaccine dose 16,340 lo dah hrang turin an tih thu an rawn sawi a, vaccine man hi Mizoram sawrkarin a pek tur a nih vangin a siamtute nen indawrna kalpui mek a ni. Tarlan tawh thin angin kum 18-44 inkar te hnena vaccine pek tur hi State sawrkarin an lei vek a ngai tawh dawn a, vaccine siamtuten mamawh ang zat an siam chhuah theih loh avangin State tam takin May ni 1 atangin an kalpui thei dawn lo a ni. Vaccine dose khat man hi Serum Institute hian an rawn tihniam leh tawh a, dose khat zelah Rs. 300 (GST tel lovin) chawi a ngai dawn a ni.

COVID-19 hri kaite dahna tur CCC leh Quarantine ngaite khunghranna tur hmun  indaihlohna a nasa chho tan vanga harsatna awm te sawiho a ni a. Abik takin Community Covid Care Centre  (CCCC) siam belh a tul thu sawilan niin. CCCC siamna tur bakah CCCC te a tul anga vila, an mamawh leh harsatnate enpui zung zung tur committee din tum a ni.

Heng bakah hian COVID-19 vanga nunna chan hmun hla tak taka ruang dah ngaite phurhna tur Morgue Van/Ambulance a bika ruahman a tul thu sawi a ni a. A theih chin chinah Home Isolation/Home Quarantine kalpui tha tih niin, hemi chungchangah hian him zawka kalpui a nih theihnan mipuite hnenah ching taka inhrilhfiah tha tih a ni.

Health Minister chuan tun dinhmunah Oxygen leh Ventilator chungchangah thlaphanna tur a awm lo tih sawiin, FK Oxygen plant Zuangtui ten May thla chhung zawng ZMC-ah oxygen mamawh ang te a thlawna an refill dawn bakah Delhi Mizote hman tur oxygen thahnem tak an thawn dawn tih a sawi a. Chief Minister’s Relief Fund-a Zoram mipuite himna tura pawisa thawhtu an pung leh tan chu lawmawm a tih thu sawiin, mi zawng zawngin kan sahimna tur atan hian mawh kan lak ngam theuh a tul takzet a, kan tanrual a ngai lehzual takzet tawh a ni, a ti.