3554/2022-2023
11.02.2023 : Vawiin khan Thingsulthliah-I ah Horticulture Department hmalakna a din Ripening Chamber & Collection Center cum Manager Quarter hawnna hun neih a ni a. He hunah hian bialtu minister Pu R.Lalzirliana chu khuallian niin khawl leh building thar te hi a hawng a. AMC Mayor Pu Lalrinenga Sailo chuan khualzahawm niin a hmanpui bawk.
Hawnna inkhawm Thingsulthliah Diakkawn Branch YMA Hall-a neih ah thusawiin Pu R.Lalzirliana chuan Thingsulthliah tlangdung chu khaw taima, Aizawl chawmtu ni reng thin an ni, a ti a. Minister chuan mizo kuthnathawktute chu mi taima tak tak vek an nih thusawiin hlawhtlinna an chan zel theih nan zirchianna tha neih zel a pawimawh takzet a ni, a ti bawk. Vawiina hawn tak khawl leh hmunhma thar te chu tangkai taka hmang turin kalkhawmte chu duhsakna a hlan a ni.
Khualzahawm Pu Lalrinenga Sailo chuan he hunah hian thusawiin Mizoram sawrkarin kuthnathawktute a ngaipawimawh takzet a ni, a ti a. SEDP pawh a tawpna ni lovin, bultanna tur a nih thu leh thawktu tak tak ten tangkai taka an hman zel a beisei thu a sawi bawk.
He hunah hian Horticulture Director Pu C.H. Lalmuanpuia pawhin thusawiin, Horticulture department-in kuthnathawktute tana hma an lakna leh hmachhawp hrang hrang te a tarlang a ni.
Ripening Chamber hi Centrally Sponsored Scheme - Mission for Integrated Development of Horticulture (MIDH) hnuaia din a ni a. Collection Center cum Manager Quarter hi NABARD sum hmanga sak a ni. Hawnna inkhawmah hian Horticulture Department leh Thingsulthliah VC-1 ten inremna thuthlung ziak nghalin, Ripening Chamber hi balhla chingtu ten tangkai taka hman theih nan Thingsulthliah VC-1 hnenah an hlan nghal a ni.
Hawnna inkhawm hi Pu L.Lalhmingmawia Pachuau, Addl Director, Horticulture Department chuan a kaihhruai a. Dr.Robert Lalrinsanga, Deputy Director, Horticulture Department chuan technical report a pe a, Pu Lalvansanga, Aizawl District Horticulture Officer chuan lawmthu sawina hun hmangin hawnna inkhawm hi a khar a ni.
