Vawiin chawhnu dar 1 khan DC’s Conference Hall, Keifangtlang, Champhaiah Cable TV Digitization chungchangah meeting neih a ni a . Meeting hi Cable TV Digitalization lama Champhai District Nodal Officer, Pu C. Lalzarliana, Addl. DC. in a kaihruai a, DIPRO Pu Neng Thianlala, MIS bakah Champhai District chhunga Cable TV enkawltu mi 42 lai an kal khawm a ni.

Meeting kaihruaitu, Cable TV Digitalization lama Champhai District Nodal Officer, Pu C. Lalzarliana, Addl. DC chuan mipuiten an duhzawng thlan bik channel chauh an en a, an thlan bik atang chauha en man an chawi theihna tura India sawrkarin Cable TV Digitization a kalpui chu mipuite hamthatna tur a chauh a ni, a ti a. Cable TV Digitization chu thil thar anih avanga inpuahchahna hun a duh rei tih sawiin Chairman chuan Cable TV Digitization Phase III in a huam, Champhai District-a khaw pali, Champhai, Khawzawl, Khawhai leh Biate te chu December ni 31, 2015 a inpeih tura tih an ni chungin tun thlengin hun pek an la nih avangin engtik hunah pawh tuna signal pangngai, Analog signal titawp a, Digital Signal hmang tura tih mai theih reng a ni, a tiin heng khaw palia TV nei chhungkua zawng zawngte chu a rang lama in peih turin a ngen bawk.

Meeting chuan Cable TV Digitization Phase III in a huam khaw pali mipuite chu September, 2016 hmaa Set Top Box nei hman vek turin a ngen a. Phase III thlenga la tuamloh khua zawng chu Phase IV in a huam tih tarlangin, sawrkar laipui Ministry of Information & Broadcasting-in December ni 31, 2016 hmaa digitization kalpui tura hriattirna a chhuah tawh chu Champhai District-ah pawh kaltlangpui a nih dawn avangin Champhai District chhung a TV nei, Set Top Box la neilo zawng zawngte chu a hma lama nei theuh turin a ngen bawk. Meeting-ah hian miipuite awlsam zawk nan Cable TV enkawltuten installment-a lei theih tura ruahmanna an siam thu tarlan a ni bawk.

Meeting-ah hian Champhai District-a Cable TV neitu lian pahnih Pu Vanlalhmuaka, LCN neitu leh Pu Lalhmingmawia Pachuau, CCN neitute chuan Cable TV digitization kalpui tura an hmalakna report peiin an harsatnate an sawi a. Cable TV Operator kalkhawmte pawhin zawhna zawtin an harsatnate committee hnenah an thlen bawk.

Meeting zawh hian Champhai District Nodal Officer, Pu C. Lalzarliana, Addl. DC chuan media kaltlangin Champhai District mipuite hnenah Cable TV Digitization chungchanga sawrkar hmalakna ngaipawimawha tawiawm tura mipuite ngenna a siam bawk.