Vawiin khan Chief Minister Pu Lal Thanhawla chuan Lamlian National Highway 154 dunga thing phunna programme 'Green National Highway 154' hawnna chu Community Hall, Buhchangphai a hmanpuiin he lamlian kawngsir hmun li - Buchangphai, Buhchangphai Hall Veng , Bukvannei leh Saihapui (K) ah te thing a phun a. National Highway 154 hian Bilkhawthlir atanga tanin  Bairabi a pawh a, Buhchangphai, Bukvannei leh Saihapui(K) te a paltlang a ni.

Pu Lal Thanhawla chuan kan ramngaw te kan tichereu zel chuan kan ram hi thlaler ah kan siam ang tih a hlauhawm a, kan chhuan lokal zel turte hmakhua ngaihtuaha, an anchhia kan hlawh loh nan he ram hi an tan chenna tlaka siamin kan hnutchhiah a ngai a. Zoram nuam siam turin thing leh mau leh nungcha chitin reng kan humhalh a duat taka kan enkawl hi kan zavai mawhphurhna a ni, a ti a. Thing phun belh a pawimawh rualin kan phunsa te an damkhawchhuah nan kan venhim leh enkawl zui a pawimawh a, an puitlin nan theihtawp kan chhuah tlan hi kan tih tur dik tak a ni, a ti bawk a. Parliamentary Secretary leh bialtu MLA Pu K Lalrinthanga'n hetianga ruahmanna tha tak a ngaihtuah chhuak chu lawmawm a tih thu a sawi a. Thing leh mau leh nungcha humhalh chu Ringtu te tih tur dik nia a hriat thu sawiin hei hi a Thlarau hle a, rawngbawltute pawhin Pulpit atanga an sawichhuah tam chuan hma kan sawn hle dawn a ni, a ti bawk.

Remna leh muanna chungchang sawiin Chief Minister chuan remna leh muanna kan neih hi kum 30 a ni dawn a, tuboh leh dolung inkarah harsatna leh tawrhna hrang hrang paltlangin Pathian remruatna leh malsawnna in remna leh muanna kan nei a, remna leh muanna hi Pathian lam tang programme a ni, a lama kan tan hmasak chuan kan lamah tangin kan thil tih reng reng a tihlawhtling thin a ni, a ti a. Politics chungchang sawiin Pu Lal Thanhawla chuan politics hi mipui te tan rawngbawlna hmanraw pawimawh tak, Pathianin mihringte hnena a pek a ni a, mipui leh ram hmasawn nan a rawngbawlna kawng pawimawh tak a ni a, a boruak inlumlet hian angkhatin min hrut a, a chungah hian engkim a innghat a, kan Thlarau nun thleng a nghawng a ni, a ti.

Vairengte leh Bilkhawthlir leh a chheh vela khua awmte chu a ram a that thu leh buh an thar tam thu sawiin Sawrkar policy thar New Economic Development Policy hnuaia helai hmun a buh thar te Mizoramah ngei a cham a, ei leh barah intodelhna kawnga hma kan sawn theih nan buh herna mill din chu Sawkarin a ngaihtuah mek thu a sawi bawk. Helai hmuna chengte chu an ram neihsa te roh thiama, renchem a, milian, mi hausa leh mi thil tithei te tlawn nan a hmang lova hmathlir thiam a, an tu leh faten eizawnna kawnga an hman theihna turin zuah a, rochun turin a fuih a. NLUP leh sawrkar ruahmanna reng reng a hlawhltlinna chu a dawngtute kutah a innghat a, leilung faten neitu rilru pua, rinawmna, dikna, taimakna leh Pathian tihna nung nen hengte hi kan dawnsawn a, theihtawp chhuah a hma kan lak a ngai a ni, a ti.

Vawiin programme hi Parliamentary Secretary leh Serlui bialtu MLA ni bawk Pu K. Lalrinthanga'n kaihruaiin thingphun hi khawvel sik leh sa danglam mek venna kawnga ke penna pawimawh tak a ni, a ti. He hunah hian Kolasib DC Pu H.Lalengmawia, IAS pawhin thu a sawi bawk a ni.

Tlai dar 4:30 velah Chief Minister hi Kolasiba Head of Office ten Circuit House ah lo hmuakin inkawm hona hun tha tak an nei bawk a ni.