Vawiin khan General Administration Department buatsaihin Mizorama Cable TV service pe chhuaktu Multi System Operators te leh an hnuaia Local Cable Operators leh Last Mile Operators ten Cable Television Networks(Regulation)Amendment Bill, 2011 hnuaia Cable TV service pe chhuaktu ten analogue signal titawp a, digitized signal chauh pe chhuak tawh tura hma an lak dan  chungchang thlirhona co-ordination meeting chu Secretariat conference hall-ah neih a ni a. Pu Vanlalmawia Jt.Secretary GAD in meeting hi kaihruaiin sorkar department pawimawh te leh district hrang hrang atangin D.C te leh an aiawh te bakah Nodal Officer leh MSO te, MICODA leh Mizoram Consumers Union hruaitute an tel a ni. 

Meeting ah hian District hrang hranga MSO te leh an hnuaia LCO/LMO te atangin Digital Addressable Cable TV Systems(DAS) an kalpui tawh chin leh an dinhmun tlangpui te ngaihthlak a ni a. Consumers Union hruaituten Cable TV Service Provider leh Operators te atanga beiseina leh ngenna an neih te nen inpawh taka sawihona neih a ni a. Pu Vanlalmawia chuan GAD chu Cable TV digitization chungchanga mawhphurhtu department a nih angin district hrang hranga Nodal officer te chu an area chhunga cable TV digitization chungchanga hmalakna tur te hrilhin Cable TV Networks(Regulation)Amendment danin a phut te chu vawi lehkhatah zawm kim nghal vek theih ni lo mah se, mumal taka thil kalpui thuai a nih theih nan mawhphurtu zawng zawng te chu tan la turin a chah a ni.