1604/2023-2024

Kolasib 22nd August 2023: Vawiin chawhnu khan Conference Hall, Dholai Police Station-ah Cachar leh Kolasib district-a sawrkar thuneituten ramri a ralmuanna a awm chhunzawm theih nana thawh ho dan tur relin thutkhawmna an nei a. He thutkhawmna ah hian Deputy Commissioner, Superintendent of Police, Divisional Forest Officer, SDO (C), Addl. SP leh District Information & Public Relations Officer-te an tel a ni.

Pu John LT Sanga, Deputy Commissioner chuan Kolasib leh Cachar district chu ramri thui tak inṭawm an nih angin a ṭul apianga inpuitawn tur leh boruak muanawm siam tur a thawh hona ṭha a awm a pawimawh thu sawiin thutkhawmna hmasa a thil lo rel tawh bawhzuina hrang hrang tarlanna hun a hmang a. Assam leh Mizoram a ramri inṭawm district hrang hrangte inkar a boruak ralmuang a awm zel theih nan DC leh SP-te inkar a inbiakna kalpui ṭhin a nih bak ah Hailakandi district a Border Festival buatsaih a nih thu leh Hailakandi leh Cachar district-a thuneitute chu Kolasib District-a Chapchar Kut 2023 lawmna ahte pawh an tel thu a tarlang bawk a ni.

Thutkhawmna ah hian ramri ah zin mi ten harsatna an tawh loh nan ramri a sipai leh Police duty-te chu a ṭul anga tih tlem hret hret a pawimawh thu te, ramri kan a ruihhlo leh dan lova ramsa tawlh awm ṭhin veng tur a thawhho dan tur te, ramri a State pahnih Forest Department mi leh sa ten hmalak an tum apiangin harsatna a thlen loh nan inhrilhhriat hmasak ṭhin a pawimawh thu te sawi a ni a. Mizoram ah MLA inthlanpui nei tur a inbuatsaihna kal mek ah Cachar district thuneitute chuan a ṭul apiang a puih an inpeih reng thu an sawi a. Tun hnai ah Assam registration number nei Alto motor ṭhahnem tak Kolasib paltlang a Mizoram lo lut an awm ṭhin chu uluk zawk a thlithlai a pawimawh thu sawi a ni bawk.

Vawiin ṭhutkhawm ah hian Pu Rohan Kumar Jha, IAS, Deputy Commissioner, Cachar district, Pu Numal Mahatta, SP, Cachar, DFO, Addl. SP Cachar-te an tel a. Kolasib District aiawhin Pu John LT Sanga, Deputy Commissioner, Kolasib, Pu Lalrinawma Traite, SP, Pi Margaret Lalramchhani, DFO, Pu Cheemala Shiva Gopal Reddy, SDO (C), Pu Lalremruata Sailo, SDO (C), Vairengte leh Pu Hmingthanzuala, DIPRO, Kolasib te an tel a ni.