Chakma Autonomous District Council (CADC)-a Caretaker ni mek, Lawngtlai Bawrhsap Dr Arun T., IAS chuan fel fai zawka CADC-in hna a thawh theih nan thu chhuah hrang hrang a siam. 

CADC Caretaker thu chhuak ang chuan, CADC hnuaia zirtirtu atana lak, sikula zirtir hna thawk lova office hrang hranga officer, assistant, UDC, LDC, etc. anga chhawr an awma hriat a ni a. Hei hi ‘Right to Education’ dan kalh a nih avangin chuti ang zirtirtute chu an thawhna department atangin sikul hrang hrangah October ni 15, 2017 hmain sawn chhuak vek tur a ni a. An thawhna department hotute pawhin a rang thei ang bera chhuahtir tur leh chuti ang zirtirtute chuan an hna zawm nghal thuai tura hriattir an ni. CADC Executive Secretary chu he thil hi lo bawhzui a, October ni 18 hma ngeia Caretaker /Lawngtlai Bawrhsap hnena hma lakna report theh lut tura tih a ni. 

CADC hnuaia sikul hrang hrang dinhmun en dika zir chiang turin member pathum – District Council PHE Asst Engineer, District Council Soil Conservation Officer leh District Council Sericulture Extension Officer te telna committee din a ni a. He committee hian CADC hnuaia primary leh middle sikul hrang hrang building infrastructure te, toilet leh tui dinhmun te, zirtirtu leh thawktu dang dinhmun te, chawchhun sem dan te, RSBY leh programme dang dang kalpui dan leh sikul mamawh hrang hrang zir chiangin, November ni 30, 2017 hmain Caretaker hnenah report a theh lut leh dawn a ni. 

CADC Caretaker chuan CADC hnuaia hmasawnna hna hrang hrangte mipuiin an hriat theih nan CADC website tihchantlunna tur thu chhuah a siam bawk a. CADC hnuaia department hrang hrangte chuan thawktu awm dan leh an hlawh te, department hnuaia scheme hrang hrang leh hna thawh mek chungchang – contractor, project cost, thawhna hmun, hmasawn dan leh hriattirna leh thu chhuah pawimawh zawng zawng chu website enkawltu CADC IPRO hnenah theh lutin, CADC website: www.cadc.gov.in-ah dah zel tawh tur a ni.