Aizawl District Swachh Bharat Mission (Gramin), PHE Dept. leh District Education Dept. buatsaih Global Handwashing Day 2017 (Khawvel pum a kut silfaina ni) chu vawiin khan kum danga tih thin dan angin PHE Rural WATSAN Division Office Complex, Laipuitlang-ah Dr. A. Muthamma, D.C, Aizawl hovin hman a ni a. Kumin thupui thlan chu ‘Our hand, Our future’ tih a ni.
Aizawl D.C chuan thu sawiin kut silfai hi natna hrik laka invenna pawimawh ber te zing ami a ni a, mithiamte sawi dan chuan ei leh in tur siam dawn te, ei zawh te, inthiar zawh leh damlo kut leh thil bawlhhlawh khawih zawh te hian kan kut chu Sahbawn nen ngei second 20 tal kut sil thin tur a ni tiin, tui thianghlim takin kan tleuh fai leh ziah thin tur a ni a, hei hian natna tam tak lakah min veng thei a ni a ti.
He hunah hian Er. Lalsanga, EE, PHED in kut sil dan tur demonstration a nei a, kal khawm ten kut silfai pawimawhzia thutiam (Pledge) an sawi rual a, hemi zawh hian kalkhawm ten kut silfaina hun an hmang a ni.
He function tawiah hian Laipuitlang Local Council leh a area-a Middle School naupang leh Office staff an vaiin mi 300 zetin kut silna hun an hmang a ni.
