Vawiin khan SSA Mission, Lunglei bultumin Lunglei District huamchhunga  school  hrang hrang ah “Our hand, Our future” tih thupui hmangin khawvel pum huap Kut Silfai Ni - Global Handwashing Day 2017 hman a ni a. He Ni pual hian vawiin chawhma dar 11:00 khan Government Model Middle School (JNM) ah programme buatsaih niin, Dr VLMS Dawngliana, CMO Lunglei chuan khuallian niin a hmanpui.

Dr VLMS Dawngliana chuan he hunah hian thu sawiin hriselna tha nei tur chuan kan invawn thianghlim a tul a, kan kut fai taka sil hi kan ngai pawimawh hmasa ber tur a ni tiin kut silfai tawk loh avangin natna tam tak kan inkaichhawn thin a ni, a ti a. Kawthalo leh awmna (pneumonia) avangin kum tin naupang maktaduai  1.70 an thih phah thin a ni tiin Lunglei CMO chuan heng natna te hi kut silfaiin a pumpelh theih a ni, a ti a. Kumin Global Handwashing Day 2017 thupui “Our Hand, Our Future” tih hi school naupangte tan chauh ni loin mitin tan a pawimawh a ni tiin Dr VLMS Dawngliana chuan zirlaite chu midang zirtir chhawng  zeltu ni tur leh mahni chhungkua leh veng theuha kut silfai pawimawh zia lo thehdarh zel turin a chah bawk.

He hun hi Pu Micky R Lalenkawla, District Project Coordinator SSA in a kaihruai a, sawrkar laipui Ministry of Human Resource Development leh Department of School Education & Literacy, MDM Division chuan Global Handwashing Day 2017 atan 15^th October 2017 an ruat a, chawlhni ah a tlak avangin vawiinah hman a ni tih kalkhawmte a hrilh a. India ram pumah  Mid Day Meal ei dawn leh inthiar zawhah naupangten sahbawn nen kut an silfai ziah thin a ni tiin kut silfai dan hi mumal takin naupangte zirtir an nih thu a tarlang a. Zirlai kalkhawmte chu an kut silfai bakah an taksa pum enkawl fai an ngaih pawimawh a tul a ni tiin Lunglei SSA DPC chuan hmasawnna tluantling nei tur chuan mipuite hriselna a pawimawh hmasa ber a ni, a ti bawk.

Global Handwashing Day hi Global Public-Private Partnership for Handwashing with Soap (PPPHW) hmalaknain kum 2008 atang khan khawvel pum huapin kum tin October ni 15 ah hman thin a ni a.  Vawiin District Level Global Handwashing Day hmanna ah hian zirlaite chuan a huhovin kut silfaina an nei a. He hunah hian Government Model Middle School (JNM) leh Government Model Primary School Electric Veng zirlaite leh zirtirtute bakah sawrkar official leh media mi te an tel tha hle.