Home Minister Pu R. Lalzirliana chuan thawhrimna tello hausakna chu thil tlo lo leh hlauhawm a nih thu sawiin, hausakna um a dan kalh thil ti thin te an tluan loh thin zia atangin thawhrimna tello hlawhtlinna chu awm ve thin mahse a itawm lovin a chhuanawm lohzia a lang chiang a ni, a ti. He thu hi vawiina Students' Self-Support Union (SSU) General Assembly vawi 32-na, Chanmari YMA Hall-a neihah khuallian nia a sawi a ni.

Home Minister chhungkaw harsat avanga mahni inchawm paha lehkhazir thinte chu mi chhhuanawm leh entawntlak an nih thu sawiin, hnathawh hi a zahthlak lova, a zahpuiawm loh a ni, a ti a. Thalaite zinga mahni nu leh pa, pi leh pu te thawhchhuah sa ringa awm awl leh nawmsak ringawt tumte hi an chhuanawm loh thu sawiin Home Minister chuan nakin lawka mahni nu leh pate chawm lettu tur an nihzia hre reng chunga tuna hun tha an neih hi tangkaia hmanga zirlai tha leh hlawhtling ni ngei turin kalkhawmte a duhsakna a hlan a. Mi thawkrim te chu mi hlawhtling an nih fo thin thu sawiin, zirna lamah pawh thiam theilo a ngaihte hi beidawng duh lova tumruhna nen a beih tlat chuan dinhmun tha leh sang zawk an chang nge nge thin thu a sawi a. Mizo zinga mithiam leh hlawhlting hmasa te pawh kha an taimak rah tha an seng vang a nih thu a sawi a ni.

Khuallian hian zirlai intodelh thlan chhuah mi pathum (3) hnenah Self-Support Award 2017 a hlan nghal a ni. Award hian certificate leh pawisafai cheng singkhat theuh a keng tel a; chawimawina dawngtute chu Lalthankima (BA Economics, Govt. Aizawl North College), Jenny Lalnunthari, Vairengte leh Francis H. Lallungmuana (B.Com, Govt. Hrangbana College)-te an ni.

Vawiin hunah hian Pu Robert Romawia Royte, Chief Managing Director, NECS chu khualzahawm a ni. Kumin SSU General Assembly hi ni hnih awhin, October ni 14 (Inrinni), 2017 khan NLUP Conference Hall-ah rorelna neia tan a ni.