Vawiin khan Aizawl Civil Hospital Medical Superintendent Dr.K.L.Remsanga hovin Kayakalp External Assessors te leh Ministry of Health and Family Welfare, Govt.of India aiawh lokal te bakah Civil Hospital-a Department tin Head of Department (HOD)-ten meeting pawimawh tak an nei.

Meeting-ah hian Ministry of Health and Family Welfare aiawha lo kal Pu Mukesh Bajpai, Senior Architect leh Pu R.K.Upmanyu, Sr. Consultant te chuan an lo kal chhan sawiin Aizawl Civil Hospital-a hmasawnna hna hrang hrang tun hnaia thawh zawh tak leh thawh mekte a hmuna rawn en bakah hma lak zel dan tur duanpui an tum thu an sawi a. Head of Department-ten an department theuha hnathawhna tur bungrua (equipments) leh hmunhma thawm that ngai lai nia an hriatte Ministry of Health and Family Welfare aiawhte hnenah hian an thlen a ni.

Vawiin vek hian sawrkar damdawi in fai inelna Kayakalp atana Aizawl Civil Hospital endik hna chu thawh a ni bawk a. Kayakalp inelna hi thuah thuma kalpui niin a hmasa berah mahni leh mahni inendik, internal assessment neih niin heta mark 70 hmu pha te hian District Hospital dang atanga endiktu, peer assessor-te an hmachhawn leh a. Aizawl Civil Hospital hian endikna chhawng hnihah mark 70 chunglam an hmuh avangin vawiin hian sawrkar laipui aiawha endiktu inspection team-te an hmachhawn ta a ni.

Kayakalp Inspection team-ah hian National Health Mission Consultant Dr.Lalchhuanawma leh Dr.Lalramliana Dy.Director DHS(M) bakah Dr.Evelyn Lalremsangi leh Dr.Laldinpuii, Consultant, NHM te an tel a ni.

Hospital fai, nuam leh thianghlim, rintlak, kalphung felfai taka zawm leh dan ang thlapa bawlhhlawh sawngbawl kawngah sawrkar hospital ten tan an lak lehzual theihna turin sawrkar laipui chuan Kayakalp award a siam a. District hospital titha ber hnenah cheng nuai 50, pahnihna hnenah nuai 20 pek thin an ni. Aizawl Civil Hospital hian  kum 2015 khan District Hospital fai ber lawmman a dawng tawh a ni.