October ni 11-14, 2017 chhung khan Lawngtlai Bawrhsap Dr Arun T., IAS chuan Lawngtlai District-a khaw thenkhat – Chawngte, Hmunlai, Chawngtelui leh Mampui te a tlawh a. Hmasawnna kawnga hma lak dan tur hrang hrang a en fiah.

Chawngte-ah hian Lawngtlai Bawrhsap chuan CADC Caretaker-a ruat a nih angin CADC official-te nen inkawm hona hun a buatsaih a. He hunah hian CADC hnuaia department hrang hrang official-te chuan an department hna thawh dan lo hrilh fiahin, CADC huam chhung hmasawnna atana hna thawh zel dan tur an sawi ho va. Mizoram sawrkar hnuaia thawk official-te nen pawh inkawm hona hun buatsaihin, an hna thawh dan an thlir ho va, hma lak zel dan tur te pawh an sawi ho bawk.

Bawrhsap hian Chawngte-a CADC office bakah, Govt Lawngtlai College, Circuit House leh Chawngte Community Health Centre te chu tlawhin, an dinhmun a en fiah a. Chawngte bazar-a vantlang bual in sak mek leh Saizawh W lam kawnga Govt Lawngtlai College academic building leh Boys’ Hostel sak thar pawh a hmunah a tlawh nghal a. College building hi sak zawh ni tawh mah se, tui leh eng a la awm loh avang te, zirlai naupang len vekna tur khawpa lian a nih loh vang leh exam inbuatsaih lai a nih vang tein an la luah lut thei rih lo va, kum tawp lamah chuan insawn luh theih an tum thu zirtirtute chuan an sawi a ni.

Lawngtlai Bawrhsap hian kal kawngah Mampui, Hmunlai leh Chawngtelui khua te pawh tlawhin, khawtlang leh tlawmngai pawl hruaitute nen khawtlang mamawh hrang hrang an sawi ho va. Faina leh thianghlimna, hriselna leh zirna leh hmasawnna hna hrang hrang thawhna kawngah tha tak taka thawhpui turin Bawrhsap hian khawtlang hruaitute chu a ngen nghal bawk.