Vawiin khan Lawngtlai District SSA Mission buatsaihin khawvel pum huap kut sil fai ni (Global Handwashing Day) 2017 chu Lawngtlai-III-a CYLA Hall-ah hman a ni a. Lawngtlai Bawrhsap Dr Arun T., IAS chuan he hun hi a hmanpui.

Bawrhsap Dr Arun T. chuan hriselna atana fai pawimawhzia sawiin, kan ei tur leh thil eng kim kan khawihna kan kut chu a fai reng a pawimawh tih a sawi a. Mi thiamte'n kut sil fai dan tur leh sil hun an sawi te chu tha taka zawm a, a taka hmang turin zirlai naupang kal khawmte chu a chah a ni.

He hun hi Lawngtlai District SSA DPC Pu C. Lawmsangzuala'n a kaihruai a. Lawngtlai District Hospital-a Medical Officer Dr Zothanpari Chhakchhuak chuan zirlai kal khawmte chu PowerPoint presentation hmangin kut sil fai pawimawhna, a sil fai dan tur leh sil fai hun te a zirtir a. Kut sil fai chu naupang thihna tihhniamna kawng tha ber a nih thu te, sahbawn nen uluk takin second 30 chhung kutphah, kut kar, kutchang, kut tin, kutzungpui leh banrek te sil fai thin tur a nih thu leh sil zin luat a awm loh thu a sawi.

He hunah hian Lawngtlai DEO Pu Lalzuiliana, PHE SDO Pu T. Mangliandinga, DIPRO Pu C. Lalhruaitluanga, zirtirtu leh sikul naupang thahnem tak an tel a. Hun hman zawh hian PHE Department-in Hall kawta kut sil faina tur an dahah Bawrhsap hovin kal khawmte chuan a dan dik takin kut an sil fai nghal a ni.

Global Handwashing Day hi kum 2008 atang khan khawvel pumah a rualin kum tin October ni 15-ah hman thin a ni a. Kumin hian Pathianni a nih avangin Lawngtlaiah chuan vawiin khan hman a ni.