Chakma Autonomous District Council (CADC) inthlana hman tur Electronic Voting Machine (EVM) te chu vawiin khan Lawngtlai DC Office strong room atangin Chawngte-ah phurh thlak a ni.

Chakma Autonomous District Council-a sawrkar ding lai term chu April thla hian a tawp dawn a. State Election Commission chuan inthlanna tur a thil pawimawhte a buaipui chho mek a. CADC inthlan hun tur hi tihchian la ni lo mah se, lo inbuatsaih lawk nan naktuk leh naktip hian Chawngte-ah  EVM First Level Checking neih a ni dawn a. Chumi tur chuan vawiin khan Bharat Electronic siam EVM 124  chu Lawngtlai atangin Chawngte hi panpui a ni.

CADC-ah hian MDC bial 20 a awm a. He inthlannaa hman tur electoral roll tihchhuahah chuan voter hmeichhia 15087 leh mipa 15478, an vaiin vote nei thei mi 30565 an awm.