Vawiin khan Lunglei DC Pi Lalzarmawii, IAS chuan a office chamber-ah MJA Lunglei Officer Bearer (2018-2020) thlan tharte kawmin inhmelhriatna hun an hmang a, Lunglei District hmasawnna tura hmalakna hrang hrang te a sawipui bawk.

Pi Lalzarmawii chuan mipui rorelna ram (democracy) ah media-te an pawimawh takzet a ni tiin MJA Lunglei hruaitu tharte chu mipuite rawngbawltu pawimawh tak an ni tih hre nawn leh fo turin a chah a. Journalist-te chu uluk leh fimkhur taka thu ziak thin tur leh an thuchhuah tur chu thudik a ni em tih finfiah hmasa turin a chah bawk. Lunglei District MJA ten sawrkar hmalakna hrang hrang phur taka an tawiawm thin avangin an chungah lawmthu a sawi a, hun lo kal zel turah District chhunga hmasawnna hna kal mek enfiahna Field Visit neih ho puiah a sawm nghal bawk. Lunglei DC chuan sawrkar hmalakna  leh schemes hrang hrangte zau zawka puanzar aniha mipui ten an hriat  zel theih nan  MJA-te thawhpuiah a sawm a ni.

Lunglei District MJA President Pu H. Lalthansanga leh hruaitu dangte pawhin thusawiin an thil ngaih pawimawh leh mamawhte DC hnenah an thlen a, Lunglei District hmasawnna turin theihtawp chhuaha ke pen chhunzawm zel an tum thu an sawi bawk.

Kum 2018-2020 Lunglei District MJA hruaitu Office Bearer-te chu a hnuaia tarlan te an ni:

President - H. Lalthansanga, Editor Lunglei Times

Vice President - Lalrintluanga Khiangte, Editor Daifim

Treasurer - F. Lalngaihzuala, News Editor JB Cable Network

Gen Secretary – V. Rokhawlkima, Editor, Ziakfung

Secy, i/c Info – Johan Lalhmunmawia, DDK Stringer

Secy, i/c Finance – Lianchama Chhangte, Editor Zochhiar