Vawiin chawhma khan Confederation of Indian Industry (CII) leh Ministry of Food Processing Industries  tangkawp chuan Aijal Club-ah ‘Developing the Food Processing Sector in Mizoram – Opportunities and Challenges’ tih thupui hmangin Food Processing Conclave 2018 an buatsaih a. Mizoram Governor Lt. Gen. Nirbhay Sharma PVSM, UYSM , AVSM, VSM chu khuallian niin Conclave a hawng a ni.

Lt. Gen. Nirbhay Sharma chuan Food Processing Conclave 2018 chu eitur sawngbawl kawnga hmalakna pawimawh tak a nih thu a sawi a. Hmasawnna tur a la tam thu sawiin sawrkar, investor leh kuthnathawktute inlungrual taka an thawhho a pawimawh thu a sawi a ni. Mizoram awmna chuan thenawm ramte nena insumdawngtawn turin hmun pawimawh tak a luah a ti a.  Tunlai thiamna hmanga thlawhhma kan lak dan te tidanglama, eitur sawngbawl sa laka kan rilru puthmang te kan thlak a, investment ti duhte ko lut tura kan inhawng a ngai a ni, a ti bawk.

CII member Pi Maggie Lalnunsangi chuan value addition leh value chain management te hmanga thei leh thlai thar chhuah te chu man man zawka tihral an nih theih thu a sawi a. Sawrkar chuan food processing a ngaihpawimawh thu sawiin, NEDP hnuaia food processing lama hamthatna awmte sawiho an tum thu a sawi a ni. CII Regional Director (East & North East) Pi Nita Karmakar chuan lawmthu sawiin Conclave hawnna inkhawm chu a khar a ni.

He Food Processing Conclave 2018-ah hian technical session pathum – Value addition & technology intervention, Central and State Government Schemes to promote food processing leh Access to market and Establish linkages te neih a ni.