Nizan khan LBS  SUZUKI 10th Inter Branch YMA  Cricket Tournament 2018,  March 22 atanga April 7 thlenga khelhtur leh Branch YMA Team 33 inelna tur chu Chief Minister Pu Lal Thanhawla chuan CYMA Hall-ah chu Cricket Bat  hmanga Cricket Ball hlap perin a hawng.

LBS  SUZUKI 10th Inter Branch YMA  Cricket Tournament 2018 hitoff programme-ah Chief Minister Pu Lal Thanhawla chuan tunhma atang tawhin Cricket thuneitute pawn Cricket chu Mizote khelhthiam chi nia an rin thu an hrilh thin thu a sawi a. Cricket lama tuimi ten Mizote  khelh ve atan awt thin mahse hunrei tak chhung khelmual hmun remchang a awm loh avanga mumal taka khelh a nih loh thu te leh tunah chuan sawrkarin thalaite tan khawvel thar a siam mek avang leh mi thilphal te inpekna avangin Cricket khelmual chhuanawm tak Suaka Cricket Ground, Sihmui ah te pawh Cricket khelhna a awm tawh a ni a ti. Mizoram Sawrkar leh Cricket Association of Mizoram(CAM) chuan member nihna leh pawmpuina The Board  of Control For Cricket in India(BCCI) atangin an dil mek thu a sawi a. BCCI chhungkaw buaina chinfel a nih hunah Mizoram dilna pawh hi a hlawhtlin a beisei awm tawh hle a ni a ti.

Chief Minister Pu Lal Thanhawla chuan India ram leh khawvel hmun tam taka mipuite atchilh, Cricket game chu Mizo te thiam chi ni ngei a a rin thu a sawi a, " Mizo naupangte chu thingkunga thereng vawm fuh tum reng renga tetlai atang tawh a lung vawm thiam vek; hnam anga hockey khelthiam a hriat; fielding a ball thlawk man ang te pawh Mizote thiam chi zawng tak a la ni leh bawk a. Cricket hi kan tuipui a kan luhchilh tak tak hunah chuan Mizo thalai tam takin eizawnna atan an hman ka ring a. Tlema thei fal deuh te phei chuan hauhsak nan an hmang dawn a ni. Cricket hi kan tuipui a kan phur pui zel hi  infiamna khawvelah kan hlawhtlinna bungthar leh turah kan ngai  a ni", a ti.

LBS  SUZUKI 10th Inter Branch YMA  Cricket Tournament 2018 hi Quarter Final thlen hma chuan Ramhlun Sports Complex leh Durtlang Ground ah te khelh kual a ni ang a; Quarter Final atangin Suaka Cricket Ground, Sihhmuiah khelh a ni thung ang. He tournament senso tam ber hi LBS Suzuki ten an tum dawn a; Cricket Association Of Mizoram pawhin Rs 2,00,000/- tournament buatsaih nan CYMA hnenah an pe bawk a ni. Branch YMA TEAM 33 zinga team 32 te hi Aizawl khawchhung YMA Branch team te an ni a; Aizawl pawn atangin Thingsulthliah Branch Team an rawn tel bawk a ni.

LBS  SUZUKI 10th Inter Branch YMA  Cricket Tournament 2018 vuak hawnna inkhawm hi CYMA Assistant Secretary Pu Peter Chhakchhuak chuan a kaihruai a. CYMA President Pu Vanlalruata leh Sponsor lam aiawh ten thusawina hun an hmang a. He hunah hian Chief Minister Pu Lal Thanhawla, CAM President ni bawk chuan LBS  SUZUKI 10th Inter Branch YMA  Cricket Tournament 2018 fixture a tlangzarh nghal a ni.