348/2023-2024

2023 Ṭomir thla ni 7: 11th Chakma Autonomous District Council (CADC) Inthlanpui neih tura duty tur polling official-te chu an duty-na tur hmun panin vawiin khan an chhuak ṭan a. He CADC Inthlanpui neih tura Returning Officer Pu David Lalthantluanga chuan Chawngte SDO (Civil) pisa aṭangin he'ng duty tura chhuakte hi a thlah a ni.

Chawngte aṭanga polling station hla deuh hmun 52-a duty tur polling party-te chuan vawiin khan an duty-na tur hmun panin, an duty-na tur hmun hi an thleng fel tawh hlawm a. Vawiina mahni duty-na tur hmun pana chhuak bak, Chawngte hnaih deuh polling station 15-a duty tur polling party-te chuan naktuk lam khian an duty-na tur hmun an pan ve thung dawn a ni.

CADC-a MDC Constituency 20 awma chuh tumte pawm fel an nih hnuah, May ni 9-a tluang taka vote thlak tura inbuatsaih a nih mek laiin May ni 4, 2023 zan khan 15-Rengkashya MDC Constituency-a Bharatiya Janata Party (BJP) official candidate Pu Amit Kumar Chakma chu mi kut tuarin a thi a. He thil thleng avang hian State Election Commission (SEC) chuan 15-Rengkashya MDC Constituency bik tan inthlan hi May ni 17-a neih turin a sawn hla a. Hei vang hian May ni 9 hian Constituency 19-a polling station 67-ah chauh vote thlak a ni dawn ta a ni.