Mizoram State Election Commission chuan a hnuaia tarlan Chakma leh Lai Autonomous Council hnuaia Village Council General Election ruala inthlanna neih lohna Village Council leh Village Council thiah leh Member tanglai boral an awm avanga hmun ruakah te hian By-Elections ni 15 October, 2012-a neih turin a puang a ni. Heng Autonomous District 2 hnuaia khaw 5-ah hian electoral roll endik hna thawh zawh fel vek a nih hnuah vote nei thei leh inthlanna tur Village Council-a seat awm zat pawh hetiang hi a ni :

 Inthlanna muanawm leh felfai neih a nih theih nan dan leh thupek kengkawhtu District Magistrate leh Superintendent of Police-te chu ruahmanna tul ang zawng zawng siam tura beisei an ni a. A tul a nih chuan ralthuam ken chungchang leh aurinna hman chungchangah khapna thupek tichhuak thei an ni. Venhimna uluk zual bikna tur ‘Sensitive Polling Station’ erawh a awm lo.

Deputy Commissioner, Lawngtlai chu District Election Officer (DEO) atana ruat a ni. Inthlanna buaipuitu - Returning Officer, Presiding Officer leh Polling Officer - atan CADC/LADC hnuaia thawktute leh tualchhung mite ruat an ni ang. State Election Commission chuan inthlanna buatsaihna kawnga mawhphurtu, police leh sorkar hnathawk zawng zawngte chu duhsak bik emaw hlauhna nei hauh lova a lai thei ang bera hnathawk turin a beisei a. An zavai hian State Election Commission hnuaia deputation-a kala ngaih an ni a, election process a zawh hma chuan Commission thuneihna hnuaiah an awm dawn a ni. Nimin atang khan Model Code of Conduct pawh kenkawh tan nghal a ni.

He inthlannaah hian a vawi khatna atan vote thlaktute kut veilam zungchalah ‘indelible ink’ hnawih a ni dawn a, hei hian vote thlak nawn tum leh mi aia vote thlak turte a veng ang.

Inthlan chuh tumte tana hming pek luh hun hnuhnung ber chu ni 3 October, 2012 thleng a ni ang a, hming pek luh te hi ni 4 October-ah endik a ni ang a, inhnukdawk duh leh te tan ni 6 October thleng hun hawn a ni ang. Ni 8 October, 2012 dar 10:00AM - 2:00PM chhungin inthlan chuhtute hnenah chhinchhiahna (symbol) sem leh an hming tarchhuah a ni ang a, hemi ni vek tlai dar 3:00PM - 5:00PM chhungin State Election Commission leh DEO, Lawngtlai hnenah List of Candidates thehluh hman vek tur a ni. Vote thlak zawh fel veleh vote tla te hi chhiar tan nghal an ni bawk ang.

State Election Commission chuan inthlanna felfai leh muanawm neih a nih theih nan inthlanna buaipuitute, political parties, media, NGOs leh mipui tawiawmna a ngen a. Mipui duhthlanna kal tlanga tualchhung inrelbawlna tha tak neih zui zel theih nana theih tawp chhuah theuh turin Autonomous District Council 2 hnuaia khaw 5-a mipuite a sawm a ni.