Health & Family Welfare Departmentin chawimawina lawmman, Award 4(pali) an dawn chu vawiin khan Vanapa Hall-ah lawmna inkhawm an buatsaih a, Chief Minister Pu Lal Thanhawla chu khuallian a ni.

Chief Minister chuan Health departmentin chawimawina lawmman an dawn chu an thawhhona that vang nia a hriat thu a sawi a. Thawhhona tha awm thei tur chuan inzahtawnna te, inchawimawi tawnna te leh inlungrualna te a pawimawh a, hei hian hmasawnna a siam a ni a ti a. Award dawnah duh tawk mai lovin, famkim lohna kan neihte siam that dan ngaihtuah turin hnathawktute chu a chah a. Tih tur tam tak kan nei a ni tih hre reng thin turin a chah bawk a ni.

Chief Minister chuan transfer leh posting thuah, sorkar hna kan thawh duh chhung chu sorkar thu kan zawm mai tur a ni tiin, transfer thu a mawngfual an awm thin chu a hriatthiam loh thu a sawi a. Doctorte chu an hna ah vannei tak, non practising allowance la reng chunga private clinic nei; civil hospitala thawk chunga private hospitala thawk bawk, a then phei chuan civil hospital hmanrua te la chhuak duh an awm te chu a pawi hle a. Rei tak thil kal dik tawh lo siam that thut chu thil harsa a ni tiin, a chhelai siam that chu kan tum reng a ni a ti.

Changkanna tehfung pawimawh tak chu zirna leh hriselna a ni Chief Minister chuan a ti a. Zirna ah chuan rual kan pawl viau a, hriselna lamah erawh chuan kan tlinglo letling der a ni a ti a.Ringtu intite chu khawvela hrisel ber awm tak, mahse cancer vei tamna ber kan ni hi a thente chu kan cho chhuah em ni ang tihte kan inen a ngai a ni a ti. Hrisel tur chuan insum theihna leh ei leh ina kan fimkhur a pawimawh tak zet a ni a ti a, hetah hian doctorte leh nurse te chu hmahruaitu an nih angai a ni a ti.

Health Minister Pu Lalrinliana Sailo pawhin thu sawiin,lawmman an dawn te chu thawktute thawhrimna vang a ni a ti a. Doctor leh nurse te mai bakah driver leh 4th grade te thlengin lawmman dawng thei tur hian tan an la a ni a ti.

Minister hian BPL cancer vei mi pahnih te hnenah tanpuina Rs.15,000/- ve ve a hlan a. Super Specialist pahnih Dr.Loncy V Lalzarliana leh Dr.Jerry Lalrinsanga Pautu te hnenah, an thiamna Mizoram tan ngeia an hman avangin Letter of Appreciation a hlan bawk a ni.

Inkhawm kaihruaitu Pi Esther Lalruatkimi, Health Secretary chuan Award lawm hi central sorkar, India Today leh NGO atanga pali (4) dawn anih thu a sawi a. Chungte chu Central sorkarin kum 2009-10 chhunga NHRM hnuaiah Second Best Performing Award te, Best RBSY Improved State Award 2011-12 te - hei hi hmarchhakah ti tha ber state kan ni; India Today in central sorkar hriatpuinain 2011-12 chhunga state te deuh bikte zinga Most Improved State in Health leh JRD Tata Memorial Award, sum fai Rs.15 lakhs keng tel chu nu leh naupang lam, reproductive sectora ti tha lawmman a sem thin te an ni a. JRD Tata Memorial Trust hi sumdawng hausa tawntaw, Business House intelkhawm NGO a ni a. Lawmman hi vawi 5 chauh an la pe nghe nghe a ni. Pawisa fai dawnte hi Mizoram chhunga NGO, fahrah leh rualbanlote enkawlna in 32 hnenah sem nghal a ni a. Sum semte hi Ministers te, Parliamentary Secretary te leh Health departmenta thawk ten an ni khat hlawh theuh an khawhkhawm nen a vaiin Rs.20.1 lakhs a tling a ni.