March ni 13-a Chakma Autonomous District Council (CADC)-a village council (VC) 88-a inthlanpui buatsaih tur leh Lai Autonomous District Council (LADC)-a Council Veng VC seat khat hnawh khah nana by-election buatsaih tura polling party 89 zinga 52 chuan vawiin khan Lawngtlai DC office kawt atangin an duty-na tur polling station lam an pan.

Polling party kal chhuak turte hian official-te hnen atangin an bungraw mamawh turte la khawmin, an enfiah a. Chumi hnuah an duty-na tur polling station theuh panin an kal chhuak hlawm a ni.

Vawiina polling party kal chhuakte hi hmun hla zual, inthlan hma ni hnih la awma chhuah ngaihnaa mi an ni a. Kal chhuak party-ah hian returning officer pakhat leh presiding officer pakhat leh security personnel te an tel a. He'ng bakah hian polling official tur mi pahnih zel chu a khaw mi hman an ni dawn a. Inthlan felfai leh muanawm tak a awm theih nan polling station inhnaih zual eng emaw zat chu sector khat zelah siamin, a vaiin sector 19 a awm a, he'ng bialte vil tur sector officer 19 zinga 15 chu vawiin hian an sector lam panin an chhuak ve nghal bawk.

Polling party leh sector officer vawiina chhuak bak zawng, polling party 31 leh sector officer 4 te chuan naktuk khian an duty-na tur polling station an pan ve leh ang.

CADC-a VC 88 awm zinga VC 6-ah chuan inthlan ngai lovin, a ding zawng zawng chuhtu awm lova tlinga puan nghal an ni a. March ni 13 hian VC 82-ah inthlanpui leh VC seat 1-ah by-election neih a ni dawn ta a ni.

Polling official-te hi vawi eng emaw zat training pek an ni tawh a. An kal chhuah hmaa training hnuhnung ber chu nimin khan DC Conference Hall-ah neihpui an ni.