Tunlaia khawvel ram hrang hranga hrileng Coronavirus (COVID -19) laka Mamit District chhung mipuite himna leh invenna atana chetlak dan tur Dr Lalrozama, IAS District Bawrhsap kaihruaina-in DC Conference Hall, Mamit-ah sawiho a ni.

Vawiin thutkhawmah hian ramdang/ hmundang atanga Mamit District kalpawhna thenkhatte chu mipuite him tlan zawk nan khar rih nise tih a ni a, Ramri dep khua-ah te hian venhimna lama thawktute, khawtlang hruaitute leh tlawmngai pawlte nena thawhhona turah inbiak rawnna neih nise tih a ni. Kanhmun kaltlanga inkalpawhna erawh englai pawha kaltlang theih tura hawn tur niin, a paltlangtute hriselna dinhmun leh zawhna chhanna tur form awmsa hmanga fill-up te chauh kaltlang phal nise tih a ni a. Kanhmun Check Point-ah hian Medical Team, Police lam leh khawthlang hruaitu/Tlawmngai pawlte a tul anga duty insiam nise tih a ni bawk.

Coronavirus hrileng laka mipuite kan him tlanna tur ruahmanna hrang hrang kalpuina tur meeting-ah hian duan a ni a. He natna tawk emaw rinhlelh tawk an awm a nih chuan Mamit District Hospital-ah Isolation Ward khum 5 leh Zawlnuam PHC ah khum 2 ruahman niin, Kanhmun Check point atanga natna kai ni-a rinhlelhte dah lailawkna atan Zawlnuam BDO Rest House chu ruahman a ni bawk.

Meeting kaihruaitu Dr Lalrozama chuan tunhnaia hrileng mek Coronavirus laka inven chu kan tihtur a ni a, chutihrual chuan mipui mimirte tan chiaina tur a awm loh thu sawiin ei leh bar chawkluhna turah harsatna a thlen dawn loh thu a sawi bawk.

Meeting-ah hian Sawrkar Department aiawh, Khawtlang hruaitu, Tlawmngai Pawl aiawhte an tel a ni.