Vawiin khan Lawngtlai Horticulture Division leh Lawngtlai Florist Association (LFA) te tang kawp buatsaih Horticulture Exhibition 2020 chu LADC Conference Hall-ah Horticulture Department-a Joint Director Pu H. Manthianga'n a hawng.

Pu H. Manthianga chuan exhibition buatsaih chu thil hautak leh inbuatsaih nasat ngai tak a nih thu sawiin, Lawngtlai Horticulture Division-in tha taka an buatsaih thei chu an fakawm a tih thu a sawi a. Exhibition chu mahni thlai thar leh pangpar khawite pho chhuahna ni satliah ngawt lovin, hma sawn zel tura incho phur tawnna leh a mamawhtute'n awlsam taka thlai leh pangpar an lei zung zung theihna tura remchang siamsakna a nih thu a sawi a. Lawngtlai District chunga huan siamtute leh pangpar chingtute chu lei tha atan damdawi lam chi (chemical) hmang tam lo tur leh hmun dang atanga thei, thlai leh pangpar lak luh ngai lova intodelh tum turin a chah.

He Horticulture Exhibition hawnna hun hi Divisional Horticulture Officer Pu C. Lianluaia'n kaihruaiin, kal khawmte lawmna thu a sawi a. LIKBK General Secretary Rev. B. Zazawna Lai chuan hunserh a hmang a. Lawngtlai Florist Association (LFA) President Pi Zodinpuii Fanchun chuan LFA din chhoh dan leh pangpar chingtute fuihna thu a sawi a. Horticulture Development Officer Pu Hunlawmawma'n lawm thu sawiin, pangpar khawi dan inzirtirna hun hman zui a ni bawk.

Tun hi Lawngtlai Horticulture Division leh Lawngtlai Florist Association te'n exhibition an buatsaih vawi thumna a ni a. Kum 2017 leh 2018-ah te khan hlawhtling takin exhibition hi an lo buatsaih tawh a ni. Tun tumah hian pangpar chi hrang hrang 16 pho chhuah niin, mi 45-in an rawn entir a. Kut hna thawktu 49 te'n thei leh thlai chi hrang hrang 16 an rawn ken khawmte pho chhuah a ni bawk.

He exhibition hi ni thum awh tur niin, exhibition neih chhung hian a duh apiang tan tlawh theih a nih bakah, thei leh thlai hrisel leh tuihnai tak tak leh pangpar mawi tak tak lei tur a awm dawn a. March ni 13, 2020 hian khar tur niin, a kharna hunah hian lawmman te pawh sem a ni ang.