Chakma Autonomous District Council (CADC) hnuaia village council (VC) inthlanpui leh Lai Autonomous District Council (LADC) hnuaia Council Veng VC seat khat hnawh khah nana by-election chu nimin, March ni 13 khan tluang takin buatsaih a ni.
CADC-a VC 88 awm zinga VC 6 (59-Dursora, 60-Chhotaguisury-I, 61-Chhotaguisury-II, 66-Gerasury, 67-Ludisora leh 88-Silbanga)-ah te chuan inthlan ngai lovin, a ding zawng zawng chuhtu awm lo (uncontest)-a tlinga puan nghal an ni a. Nimin hian CADC hnuaia VC 82-ah inthlanpui leh LADC hnuaia 71-Council Veng VC seat 1-ah by-election hi buatsaih a ni.
Ballot paper hmangin zing dar 7-ah vote thlak tan niin, tlai dar 4 thleng vote thlak hun hawn a ni a. Tlai dar 4-a vote thlak zawh hman lohna hmun thenkhatah chuan vote thlak hun hi pawh sei a ni bawk. Polling station tina vote tlate hi vote thlak zawh fel hnu zan lamah chhiar nghal a ni a. Vote chhiar zawhah Lawngtlai lamah phurh nghal zel a ni.
CADC-a village council 88-ah hian a duh apiangin an chuh theih general seat 428 leh hmeichhe tana hauh reserved seat 88, a vaiin seat 516 a awm a. Inthlan chuhtu candidate zawng zawng hi mi 972 an ni a. Vote nei mi 32,213 an awm.
LADC hnuaia Council Veng village council-a term laklawha elected member thi a awm avanga seat ruak pakhat hnawh khah nana by-election neihah hian inthlan chuhtu mi 2 (INC leh MNF candidate) awmin, voter 1,298 an awm thung.
CADC hnuaia polling station pariat (8) tih lohvah chuan tlai dar 4-ah poll khar vek a ni a. CADC hnuaia inthlan kalpuina polling station 82-a voter 31,112 awmah a zavaiin vote 26,915 tlain, vote tla zawng zawng hi 86.51% a ni a. LADC hnuaia Council Veng polling station-ah tlai dar 4-ah poll khar fel theih niin, voter 1,298 awmah vote 808 tlain, vote tla zawng zawng hi 62.25% a ni.
Inthlan felfai leh muanawm tak a awm theih nan District Election Office chu nasa takin an inpuahchah a. Inthlan neih chhung hian harsatna lian tham thleng hriat a ni lo.
He inthlan endik tur leh vil tur hian State Election Commission chuan CADC hnuaia 1-45 VC constituency-a Election Observer atan Pu K. Lalrohlua, MCS, Project Director, DRDA Lunglei leh CADC hnuaia 46-88 VC constituency bakah, LADC hnuaia 71-Council Veng VC constituency-a Election Observer atan Pu Malsawmtluanga, MCS, Additional DC, Siaha te a ruat a. Anni hian he inthlan hi a hmunah thut chilhin an vil a. District Election Officer Pi Shashanka Ala, IAS chuan Council Veng by-election hi a hmuna tlawhin a enfiah bawk.
CADC hnuaia VC 88-a inthlanpuiah hian seat awm zawng zawng 516-ah Mizo National Front (MNF)-in seat 372 lain, khaw 65-ah hnehna an chang a; Bharatiya Janata Party (BJP) chuan seat 115 lain, khaw 16-ah hnehna an chang a; Independent candidate-te'n seat 27 lain, khaw 3-ah hnehna an chang a; Indian National Congress (INC)-in seat 2 an la a; chak ber awm lohna (no majority) khua 4 a awm bawk.
LADC hnuaia Council Veng VC seat khat hnawh khahna tura by-election buatsaihah chuan MNF candidate Vanlalduhenga thlan tlin a ni.
State Election Commission-in schedule a tihchhuah ang chuan, inthlanpui neih zawh takna he'ng village council 88-a member thlan tlinte hian March ni 17 hma ngeiin executive body an siam fel a ngai hlawm dawn a. March ni 18-ah chuan inthlan kaihhnawih eng kim zo fel hman tura ruahman a ni.
Attachment
- Loading attachment...
