Mizoram Police Media Cell, PHQ chuan Novel Coronavirus (COVID-19) chungchangah hetiang hian thuchhuah an siam.
March ni 9, 2020 khan Aizawl-ah COVID-19 vei an awm thu Social Media-ah thu pahnih a darh a. Pakhat zawk chu "Ka hmelhriat hnaivai Health Department (Civil Hosp) a thawk atanga chanchin ka hriat dan in tunah hian COVID-19 confirmed case pakhat Aizawl ah vawiin khan hriat a ni a. Kan chhungte leh thiantha te kan lo fimkhur nan i in hrilh ang u" tih a ni a. A dang leh chu, '"Breaking News ITI Vengah COVID-19 suspect a awm a nia. Singapore atanga lo haw Referral Hospital ah dah an tum a, mahse a duh lo a. nichin mai khan an phur phei dar 3 vel a ni ang. Ka chhuahna atanga ka rawn hriat" tih a ni.
He thuthang pahnihte hi finfiah nghal a ni a, a hmasa zawk khi dawt thu phuahchawp, ninhlei vanga social media a post ve tawp a ni. A hnuhnung zawk hi Singapore atanga lo haw chu an awm ngei a. khawchhak lam atanga lo haw a nih avanga fimkhur thu ah pawn chhuak rih Ioh tur a thurawn a ni a, he thudik hrul ah hian thu dik lo thehdarh a ni.
He thil ah hian mi 11 (sawmpakhat) man an ni tawh a. Heng te hi thu post hmasa tichhuak tu (originator) leh lo post darh (forward) tu te an ni. Vawiinah mi 3 (pathum) man belh leh an ni a. Thu post hnuhnung zawk tichhuaktu (originator) leh he thu lo forward tu te an ni. An vai hian Vaivakawn PS C/No. 54/2020 Dt. 10.03.2020 u/s 505 (l)(b) IPC hnuaiah thubuai siamsak an ni.
Hetih lai hian March ni 12, 2020 ah thu post dang "Tun mai khan Aizawl veng pakhat a mipa naupang kum 13 mi chu Coronavirus avei tih an hmu chhuak", "Thla hmasa a test tura an thon kha a nia, voin ah a result a lo thleng ciah a, a mah hi apa hnathawhna vanga phai a awm an nia" tih hi Whatsapp ah a darh leh a. Thudik a nih leh nih loh chhui nghal a ni a, dawt thu phuahchawp, ninhlei thil tih a ni tih hriat nghal a ni.
He thu post tu (Originator) hi man a ni a Aizawl PS C/No. 169/2020 Dt. 12.03.2020 u/s 505 (1) (b) IPC R/W 6 (2) MLP Act hnuaiah thubuai siam sak a ni.
Mipui rilru tithlabar thei dawt thiI leh thudik chanve hmanga thu thehdarh hi thil pawi tak a ni a, thubuai neih theihna a ni. Mipuite i fimkhur ang u.
