Information and Public Relations Department huaihawta SEDP hnuaia Press Project Site Visit buatsaihah Lunglei District MJA te chuan nimin khan Cherhlun khua tlawhin MiMIR Project hnuaia nizung chakna hmanga current siam chhuahna Solar Power Project kalpui mek leh MYC Young Achiever Award leh Leitlangpui Rahbi lawmman te dawngtu vawk vulh hlawhtling Pu H. Lalengmawia H&T Piggery Farm an tlawh. Tin, tukin khan Hnahthial DC Pu Vanlalmawia hovin inkawmhona hun an hman bakah National Highways and Infrastructure Development Corporation Ltd (NHIDCL) leh contractor ABCIL te nen NH 54 kawng siam hnathawh mek a hmunah kalin an enfiah.

He Project visit ah hian Lunglei DIPRO Pi C. Lalremruati chuan kaihhruaiin Lunglei District MJA te hi an President Pu H. Lalthansanga hovin an kal a ni.

Cherhlun ah hian khawtlang hruaituten lo hmuakin he 50 kW Solar power project hi a hmunah kalin an enfiah a. Mizoram sawrkarin Planning and Programme Implementation Department kaltlanga kum 2018-a buatsaih khaw hrang hrang intihsiakna Mipui Mamawh Intawm Ruahmanna (MiMIR) ah Cherhlun chu Lunglei District winner niin he Solar Power Project ti puitling tur hian cheng nuai 100 an dawng a. Agni Solar Systems Pvt Ltd nen July 4, 2019 ah agreement siamin hna an tan a. Tun dinhmunah Solar module 150 bun tawh niin solar battery 240 bun tawh a ni a. Power Conditioning Unit, AC Distribution Box leh DC Distribution Box te pawh bun fel a ni tawh a. Khawl dah thatna tur hian in an sa bawk a. Tun dinhmunah current pek chhuahna (Distribution) lam anla buaipui mek a, project hi kumin July thla a zawh fel hman an in beisei a ni. MiMIR Project Committee Secretary, Pu C. Lalduhtluanga chuan he project kaltlang hian Cherhlun khaw in tinah nitin 20-30 Watt pek chhuah an tum thu sawiin an khuaa current harsatna nasa taka a sutkian dawn bakah mipuite tan thla tin current bill pawh a tlahniam sawt dawn a ni, a ti. 

Cherhlun ah hian Pu H. Lalengmawia H&T Piggery Farm pawh tlawhin a ni hi MYC Young Achiever Award leh Leitlangpui Rahbi lawmman te dawngtu vawk vulh hlawhtling niin tun dinhmunah vawk 60 vel an nei mek a. KVK Arya Project leh ATMA Farm School ah te he Farm hi vawk vulh zirna hmunpui ah te anlo hmang thin tawh a. Kum 2015 a tan niin kum 2018 ah khan vawk note 300 chuang an hralh chhuak thei a, nikum atang khan vawk talh tur zawrh chhuah lamah pawh hma an la chho mek zel a ni.

Tukin khan Press Project Site Visit a zin chhuak te hian Hnahthial DC Pu Vanlalmawia nen inhmelhriatna leh inkawmhon hun an hmang a. Hnahthial District huam chhunga hmalakna kal mek te leh hmachhawpte an sawiho a. District administration ti hmasawn zel turin hmalak mek zel anih thu sawiin DRDA, DUDO leh Treasury Office te pawh din thuai a nih tur thu DC chuan a sawi a. Tin, infrastructure development, building thuam that leh sak thar hna te pawh kalpui mek zel anih thu a sawi a. Sawrkar hmalakna hrang hrang puanzar kawngah leh Department-te finchhuah kawngah media mite chu kawng tinrenga thawhho pui a duh thu sawiin a tha zawnga mipuite kaihruaitu leh ram hmasawn zelna tura kawng kawhhmuntu ni zel tura tan la turin a chah a ni. 

Vawiin hian NH54 kawng siam mek a hmuah kalin an enfiah leh ang.