Village Council inthlan neih inpuahchahna kalzelah vawiin khan Khawzawl  District chhunga Village Council Draft Electoral Roll 2020 chu DC Conference Hall-ah District Election Officer Pu H.Lianzela chuan a tlangzarh a, Political party hrang hrang aiawhte hnenah Draft Electoral Roll 2020 copy a sem nghal a ni.

Village Council Draft Electoral Roll 2020 tlangzarh inkhawmah hian Pu H.Lianzela chuan, inthlanna felfai tak nei tur chuan Electoral Roll felfai tak neih a tul thu a sawi a. Inthlan laiin voters ten buaina an tawh lohna tur leh dik leh felfai taka Electoral Roll siam a nih theh nan political party leh tlawmngai pawlte an pawimawh hle a, tlawmngai pawlte chu thil dik tawk lo awm thei vengtu an ni tih inhriaa theih tawp chhuah turin a chah a. Electoral Roll fel fai  tak siam a nih theih nan politcal party, NGO leh mipuite chu Electoral Roll siamtute tawiawm turin a ngen bawk a ni.

Draft Electoral Roll-a thun hmaih leh sawi sel duh nei te tan March Ni 14 atanga 18, 2020 thlengin ERO emaw AERO emaw VLO hnenah emaw dilna form a bika siam hmanin dilna thehluh tur a ni a. Draft Electoral Roll-a siam that ngai, thun belh ngai kleh sawiselna awmte chu March ni 26.03.2020 atanga ni 30.03.2020 chhungin tih fel a ni ang a, March ni 31-ah final roll tar chhuah a ni ang.

Village Council Draft Electoral Roll 2020 tlangzarh inkhawmah hian Election Official-te, Political party aiawhte leh Chanchinbumite an tel a ni.

Tun dinhmunah Khawzawl district chhung khaw 28-ah Village Council 45-a awm mek a, vote awm zawng zawng hi 26021 niin, heng zinga 13080 chu mipa an ni a, 12941 chu hmeichhia an ni.