Chakma Autonomous District Council (CADC)-a village council 8-a inthlanpui leh Lai Autonomous District Council (LADC) hnuaia Lawngtlai Council Veng VC seat khat hnawh khat tura by-election neih hun atan State Election Commission chuan March ni 13, 2020 a ruat a. Vawiin khan he inthlana returning officer tura ruatte chu Lawngtlai DC Conference Hall-ah training hnuhnung ber neihpui an ni.

Election Officer Pu Lalremruata Sailo chuan returning officer tura ruatte hi training pein, hriat tur pawimawh hrang hrang a hrilhfiah a. An bungraw mamawh turte sem nghal an ni a. Naktuk atang hian inthlan buaipui tura ruat te chuan an duty-na tur hmun an pan tan dawn a ni.

State Election Commission chuan inthlan hun tur hriattirna hi nimin khan a chhuah a. Inthlan chuh tumte tan February ni 24 thleng hming pek luh theih a ni dawn a. March ni 13-ah vote thlak tur niin, vote thlak zawh veleh vote hi chhiar nghal a ni ang a, inthlan pumpui hi March ni 18-ah zo fel vek tura ruahman a ni.

CADC-a village council 88-ah general seat 428 leh hmeichhe tana hauh reserved seat 88, a vaiin seat 516 a awm a. Vote nei mi 32,213 an awm. LADC hnuaia Council Veng village council-a term laklawha elected member thi a awm avanga by-election neih turah hian voter 1,298 an awm thung.