Vawiin khan Lawngtlai Additional DC Pu K. Laltlawmlova, MCS hovin a office chamber-ah Lawngtlaia Mizoram State Day vawi 34-na leh Chapchar Kut 2020 hman dan tur rel a ni.

Kum 1987 February ni 20-a India ram state pakhat atana Mizoram hlan kai a nih champha lawmna hi February ni 20, 2020 (Ningani) zing dar 11-ah DC Conference Hall-ah buatsaih ni se, tih a ni a. Lai Autonomous District Council (LADC) Chief Executive Member (CEM) Pu T. Zakunga chu Khuallian atan sawm tum niin, zaipawl zai leh malzai te nen State Day lawmna hi hlung taka hman tum a ni.

Chapchar Kut hi March 6, 2020 (Zirtawpni) hian Lawngtlai DC office tualah hman tur a ni a. Kut Thlengtu atan Lawngtlai DC leh Kut Pa atan prominent citizen Dr RT Hnialum ni se, tih a ni a. Kut hawnna atan hlado chham chungin tlang tlir a ni ang a, zaipawlin Kut hawnna hla an sa ang. Hemi ni hian hnam lam chi hrang hrang en tur leh hnam zai ngaihnawm tak tak ngaihthlak tur a awm ang a. Ram pum huap zaithiam lar tak tak leh tualchhung zaithiamte pawh sawm tum an ni. Chapchar Kut Miss pawh thlan leh tum a ni a. Costume parade leh chhawnghnawh te pawh tih tel tum a ni.