4592/2024-2025

Lawngtlai, 10th March 2025 : Chakma Autonomous District Council (CADC) huamchhunga Village Council (VC) inthlanna neih tur atana inbuatsaihna kal zelah vawiin khan RO leh PRO- te  puala training hnuhnung chu Public School, Kamalanagar -1 ah neih a ni a. Pu Collin Hlychho, Election Officer, chuan training hi a hmanpui.

Pu Collin Hlychho chuan RO leh PRO- te chu an dinhmun leh pawimawhna hriaa, theihtawp chhuah  turin a chah a. Inthlanna fel fai leh thianghlim tak awm turin RO leh PRO -ten mawhpurhna hrang hrang an neihte hre chiang tur leh an tih leh tih loh turte chu zawm ngei tura chahin, tha taka training turin duhsakna a hlan. 

Pu Lalnunpuia Renthlei, SDO (Civil) Chawngte, Pu Gilbert Lalhlimpuia, BDO, Bungtlang 'S' leh Dr. Saithantluangi Zote, SDC te chuan training hi an neihpui a. He hunah hian RO-  te tan Vote chhiar chungchangah leh  PRO -  te tana  'Voting procedure' chungchanga hriat tur, tih tur leh tih loh tur bakah pawimawh hrang  hrang hrangte inhrilhhriatna hun hman a ni a. Zawhna leh chhanna hun hman a ni bawk. RO leh PRO - te hian naktuk (11th March 2025)  hian Polling Station an pan nghal dawn a, zing dar 7:00, dar 8:00, dar 10: 00 leh dar 11:00 ah an Polling Station theuh hi an pan ang.

CADC huamchhungah hian  VC-  88 awmin,  mipa vote nei mi- 19,162  leh hmeichhia vote nei mi-  18,721  awmin, a vaiin vote nei mi- 37,883 an awm a. Ni 12 March, 2025 zing dar 7:00 atanga tlai lam dar 4:00 thleng vote thlak tur niin, vote hi chhiar nghal a ni ang.