Tukin zing dar 7 khan Pu PC Lalthanliana, Minister i/c LAD, Social Welfare etc chuan Tuikhuahtlanga CYMA Office tualzawlah Central Anti-Drugs Squad (CADS) ruihhlo man te a halral. Heng ruihhlo halral te hi No. 4 (Heroin) Hawng 8, Cans 284 leh Caps 62; Parvon/Proxyvon mum 22,700; Ganja Kg 10 leh damdawi dang strip 81 a ni a. Tukina ruihhlo halral hi Aizawla an hralhna zat anga chhut chuan Rs. 26,07,465/- man lai a ni.

Ruhhlo halral hma hian inkhawmna hun tawite hman a ni a. He hunah hian Pu PC Lalthanliana chuan thu sawiin ram hmelma lianber do tura ram chhunga pawl lian ber leh rin tlak berin hma a la chu lawmawm a tih thu a sawi a. YMA hmalakna avang hian Zoram mipuite an thlamuanphah hle a ni tih a sawi bawk. Ruihhlo dona kawngah hian harsatna tamtak a awm thei a, mimal leh pawl indo phah nana hmang lovin Ram leh Hnam tan a ni tih rilru nghet tak put a tul tih a sawi bawk. Drugs avanga tawrhnaah hian malsawmna a awm lova; drugs halral hi a tawk mai lova, drugs kan atchilhna thinlung hi halral a ngai a ni tih a sawi bawk.

Inkhawm hi Pu R. Lalngheta, CYMA Treasurer in a kaihruai a. Pu J. Lalsailova, CYMA Fin. Secretary leh CADS Convener chuan report a pe bawk. Pu Lal Chungnunga, CYMA President pawhin thu sawiin YMA leh CADS hmalaknaah an thil tawn tawhte atanga inzir pah zel a pawimawh tih a sawi a, thuthar thehdarhtuten thudik tak an puanzar theihnan beng pahnih chhit tawn a pawimawh tih a sawi bawk.

CADS Convener hi thla thum dan zelah inthlak thin a ni a, tukina inkhawmah hian Pu J. Lalsailova, CYMA Fin. Secretary chuan Pu Vanlalruata, CYMA Asst. Secretary hnenah CADS Convener charge a hlan nghal bawk a. CADS hmalakna hian ruihhlo tamtak man a ni tawh a, halral bak hi Excise leh Police-ah tam tham tak pek luh a ni bawk a. CADS hmalakna hian mi 389 hnenah Counselling pek a ni tawh a, Police/Excise-ah mi 41 pek niin Home-a dah mi 55 an awm bawk a ni.